Pastrimi i thellë i tepihëve është i domosdoshëm gjatë verës, sepse poleni dhe papastërtitë mund të bllokohen brenda fijeve
Tepihët janë pjesë e rëndësishme e mobilimit të shtëpisë sepse sjellin ngrohtësi dhe rehati në çdo hapësirë. Megjithatë, me kalimin e kohës, mbi to grumbullohen pluhur, papastërti, njolla dhe alergjenë që mund të ndikojnë në cilësinë e ajrit dhe në shëndetin e përgjithshëm të familjarëve. Prandaj, pastrimi i rregullt i tyre nuk është vetëm çështje estetike, por edhe higjienike. Qoftë për larje të thellë, heqjen e njollave të vështira apo mirëmbajtjen e përditshme, kujdesi i duhur për tepihët zgjat jetëgjatësinë e tyre dhe siguron freski në ambient.
Tepihët shpesh mund të jenë shumë të mëdhenj dhe të rëndë për t’u larë në rrobalarëse, por ekziston një mënyrë e thjeshtë për t’i dezinfektuar duke shfrytëzuar motin me diell. Shumica kënaqen vetëm me një fshirje të shpejtë me fshesë me rrymë, por gjatë verës, pastrimi i thellë i tepihëve bëhet i domosdoshëm, pasi poleni dhe papastërtitë mund të mbeten të bllokuara në fije, duke lënë ambientin me pluhur dhe erë të pakëndshme.
Megjithatë, Sobi, një ekspert nga Rich Class Decor, ka treguar se varja e tepihëve në diell është një nga mënyrat më të thjeshta për t’i pastruar sërish. “Një aspekt shpesh i harruar i mirëmbajtjes së tepihëve është veprimi i thjeshtë i ajrosjes në diell. Kjo praktikë e vjetër nuk vlen vetëm për tepihët vintage ose të punuar me dorë, por është e dobishme për të gjitha llojet,” shkruan Daily Express, përcjell Telegrafi.
Shumë njerëz nuk e dinë se rrezet ultravjollcë të diellit veprojnë si dezinfektues natyral, duke vrarë bakteret dhe mikrobet që grumbullohen në tepihë nga ecja e përditshme mbi to. Gjatë sezonit të alergjive, pluhuri, qimet e kafshëve shtëpiake dhe poleni “futen” në pëlhurë, por varja e tepihut jashtë e ajros dhe largon lehtësisht çdo papastërti.
Tepihët mund të thithin lagështirë gjatë ditëve të lagështa, gjë që mund të shkaktojë aroma të pakëndshme në shtëpi, por ajrosja i ndihmon të qëndrojnë të freskët dhe pa erëra të këqija. Ajrosja gjithashtu i ndihmon fijet të “fryhen”, duke penguar që ato të shtypen dhe të ngatërrohen nga përdorimi i përditshëm. Kjo është një mënyrë efektive për të mbajtur tepihët të pastër gjatë periudhës kur ka më shumë polen, pa pasur nevojë të përdorni spërkatës kimikë të fortë apo shërbime të shtrenjta pastrimi.
Para se ta varni tepihun, tundeni mirë për të liruar fijet dhe për të siguruar që hiqni edhe pluhurin dhe mbetjet më të ngulitura. Pastaj, vendoseni tepihun mbi telin e rrobave. Lëreni maksimumi për tre orë dhe patjetër kthejeni një herë gjatë kësaj kohe, që të dyja anët të ajrosen mirë.
“Edhe pse drita e diellit është e dobishme, ekspozimi i tepërt mund të zbehë ngjyrat dhe të dëmtojë fijet. Qëllimi është ta ajrosni tepihun në diell për një deri në tre orë dhe të shmangni orët më të nxehta të ditës për të parandaluar zbehjen e ngjyrës,” ka thënë Sobi. Mundohuni ta varni tepihun në mëngjes, para orës 10:00, nëse mundeni, pasi mesdita është periudha kur dielli është më i fortë dhe më aktiv.
Dita ideale për pastrimin e tepihëve është një ditë e thatë, me erë dhe me pak diell. Shmangni motin e lagësht, sepse mund të bëjë që lagështia të qëndrojë në tepih, dhe shmangni ditët shumë të nxehta, sepse rrezet e forta të diellit mund t’i zbehin ngjyrat me kalimin e kohës. /Telegrafi/
