Si mund të ndikojnë zgjedhjet e SHBA-së në Lindjen e Mesme?

Herën e fundit që Donald Trump ishte president, kryeministri i Izraelit ishte aq i kënaqur, sa i vuri emrin e tij një komuniteti.

Siç raporton BBC, rrafshnalta Trump është një vend me shtëpi të parafabrikuara në peizazhin shkëmbor, transmeton Telegrafi.

Ky ishte shpërblimi i Trump për përmbysjen e politikës së SHBA-së gjysmë shekullore – dhe konsensusit të gjerë ndërkombëtar – duke njohur pretendimet territoriale të Izraelit ndaj Golanit, të kapur nga Siria në luftën e 1967-ës dhe më vonë të aneksuar në mënyrë të njëanshme.

Pyetja për banorët atje – dhjetëra familje dhe disa ushtarë – është se çfarë ndikimi mund të kenë kandidati republikan Trump ose rivalja e tij demokrate Kamala Harris në interesat e Izraelit në rajon tani.

Elik Goldberg dhe gruaja e tij Hodaya u zhvendosën në Rrafshnaltën Trump me katër fëmijët e tyre, për sigurinë e një komuniteti të vogël rural.

Që nga sulmet e 7 tetorit të Hamasit në Izraelin jugor të vitit të kaluar, ata kanë parë luftën e Izraelit me Hezbollahun të përshkallëzohet përgjatë kufirit verior me Libanin, 10 milje larg tyre.

“Gjatë vitit të fundit, hapësira jonë e bukur e gjelbër ka shumë tym, dhe pamja jonë e bukur është një pamje e raketave që Hezbollahu po na dërgon”, tha Elik.

“Kjo është një zonë lufte dhe ne nuk e dimë se kur do të përfundojë”, shtoi Elik.

Ai thotë se dëshiron që administrata e re amerikane “të bëjë gjënë e duhur”.

Kur u pyet se çfarë do të thotë kjo, ai u përgjigj: “Mbështesni Izraelin”.

“Përkrahni djemtë e mirë dhe kini sensin e përbashkët të së drejtës dhe të gabuarës”, tha ndër tjera ai.

Është lloji i gjuhës që dëgjohet shumë në Izrael. Është gjithashtu lloji i gjuhës që e kupton Trump.

Ai fitoi favorin e liderit izraelit, Benjamin Netanyahu, gjatë qëndrimit të tij të fundit si president i SHBA-së, duke hequr dorë nga një marrëveshje bërthamore me Iranin, të cilën Izraeli e kundërshtoi, duke ndërmjetësuar marrëveshjet historike të normalizimit me disa vende arabe dhe duke njohur Jerusalemin si kryeqytetin e Izraelit – duke iu kundërvënë politikës së SHBA-së për dekada.

Netanyahu dikur e quajti atë “miku më i mirë që Izraeli ka pasur ndonjëherë në Shtëpinë e Bardhë”.

Ndërsa Amerika përgatitet të votojë, udhëheqësi izraelit nuk e ka fshehur vlerësimin e tij për kandidatin republikan – dhe sondazhet sugjerojnë se ai nuk është i vetëm.

Rreth dy të tretat e izraelitëve do të preferonin ta shihnin Trump përsëri në Shtëpinë e Bardhë, sipas sondazheve të fundit.

Më pak se 20 për qind duket se duan që Kamala Harris të fitojë. Sipas një sondazhi, kjo bie në vetëm 1 për qind në mesin e vetë mbështetësve të Netanyahut. /Telegrafi/