Shtyhet seanca gjyqësore ndaj deputetëve të Lëvizjes Vetëvendosje

Ndonëse ishte paraparë që seanca gjyqësore ndaj deputetëve të Lëvizjes Vetëvendosje të mbahet sot, një gjë e tillë nuk ka ndodhur. Kjo për shkak se kanë munguar dy nga deputetët e akuzuar në këtë rast, raporton “zeri.info”.

Përveç mungesës së deputetit të Lëvizjes Vetëvendosje, Albin Kurti, në këtë seancë ka munguar edhe deputetja tjetër e këtij subjekti politik, Albulena Haxhiu.

Sipas kryetarit të trupit gjykues mungesa e deputeteve është e arsyetuar sepse të njëjtit gjenden në udhëtim zyrtarë. Për të dëshmuar në këtë rast si palë të dëmtuar ka qenë deputetja e PDK-së, Blerta Deliu.

Ndërsa për deputeten tjetër të Partisë Demokratike të Kosovës, Flora Brovina, gjyqtari ka thënë se do të lëshoj urdhëresë për sjellje me detyrim për të dëshmuar në këtë seancë gjyqësore. Ndërkaq të pranishëm në këtë seancë ishin deputetja, Donika Kadaj-Bujupi dhe Faton Topalli.

Mirëpo, i pranishëm në këtë shqyrtim gjyqësor nuk ishte avokati mbrojtës i Faton Topallit, Haxhi Millaku. Deputetët Albin Kurti, Albulena Haxhiu, Donika Kadaj-Bujupi dhe Faton Topalli po akuzohen për rastin e hedhjes së gazit lotsjellës në Kuvendin e Kosovës.

Sipas gjyqtarit të rastit seanca e ardhshme për këtë rast do të mbahet më 20 shkurt në ora 09:00./Zëri/