Shpend Maxhuni të hënën rikthehet në Policinë e Kosovës

Ish-drejtori i Agjencisë Kosovare të Inteligjencës (AKI), Shpend Maxhuni, të hënën do t’i rikthehet punës në Policinë e Kosovës. Këtë herë nuk do të ulet në karrigen e Drejtorit të Policisë, por në një pozitë të re, e cila ende nuk dihet.

Se Maxhuni do i rikthehet punës në Polici të hënën, për T7 e konfirmoi Drejtori i Policisë së Kosovës, Rashit Qalaj.

Por, Qalaj thotë se pozita nuk është vendosur ende.

Televizioni ka tentuar të kontaktojë edhe me ish-drejtorin e AKI-së, Shpend Maxhunin, për të marrë informacion për pozitën e tij të re në Polici, por i njëjti edhe pas disa tentimesh nuk është përgjigjur.

Sidoqoftë, pasuesi i Maxhunit, ditë më parë, kishte treguar se ish shefi i AKI-së, nuk do kthehet në pozitën që kishte në policinë e Kosovës.

Rikthimine Maxhunit në Polici, me shqetësim e kanë pritur shoqëria civile.

Ani pse, mundësitë ligjore ekzistojnë, sipas tyre kthimi i tij në Polici është një lloj paradoksi.

Ndërkohë, ekziston e drejta e kthimit të një zyrtari policor, i cili me vetëdëshirë largohet ose ndërron pozicion dhe kjo është e rregulluar me udhëzimin administrativ.