Shpend Ahmeti takoi deputetët serbë të Kuvendit të Kosovës

Sot një delegacion i deputetëve serb të Kuvendit të Republikës së Kosovës vizituan Komunën e Prishtinës. Kjo vizitë ishte pjesë e vizitave që deputetët serb po i organizojnë në të gjitha komunat në Kosovë.

Delegacioni përbëhej nga deputetët Slavko Simic, Nenad Rasic, Milka Vuletic, Milena Milicevic dhe Bojan Mitic.

Gjatë takimit delegacioni i Kuvendit u interesua për gjendjen e përgjithshme në komunën e Prishtinës me fokus të veçantë në situatën e qytetarëve Serb në komunën e Prishtinës.

Kryetari Ahmeti potencoi planin e reformave në komunën e Prishtinës dhe punën në përgjithësi.

Me theks të veçantë u diskutuan çështjet e rëndësishme për komunitetin serb, në disa lokacione në Prishtinë, ku u diskutua për projektet e implementuara deri tani dhe ato të cilat priten që të implementohen gjatë vitit.

U theksua edhe bashkëpunimi me komunat e tjera në regjionin e Prishtinës.

Të dyja palët u pajtuan se integrimi socioekonomik i të gjitha komuniteteve mbetet synim kryesor.

Kryetari Ahmeti foli edhe për tregun e prodhimeve vendore si një projekt i rëndësishëm i integrimit ku përmes mundësisë për fermerët të të gjitha nacionaliteteve të shesin në tregjet e Prishtinës do të ndërtohet edhe një urë ekonomike në mes të komuniteteve.

Në takim u diskutua edhe çështja e objektit të Kishës Ortodokse Serbe në oborrin e Universitetit të Prishtinës.

Përderisa deputetët shprehën shqetësimin për gjendjen ekzistuese dhe statusin e ardhshëm të Kishës, kryetari Ahmeti potencoi edhe një herë se kjo çështje është politikisht e ndjeshme dhe se do të procedohet me kujdes.

Përderisa Komuna e Prishtinës nuk ka përgjegjësi për gjendjen e tashme të sigurisë, u diskutua për nevojën e definimit të statusit ligjor të këtij ndërtimi.

“Komuna e Prishtinës çdo ndërtim në Prishtinë e trajton sipas ligjeve në fuqi prandaj edhe ka bërë thirrje që të paraqitet i gjithë dokumentacioni ekzistues në Komunë për ta trajtuar më tutje.  Çështja e pronësisë së tokës, destinimit të saj dhe çështje të tjera të lirive fetare janë përgjegjësi të institucioneve të tjera relevante në Republikën e Kosovës”, thuhet në njoftim.

Kryetari Ahmeti i ftoi deputetët që edhe në të ardhmen të vizitojnë komunën e Prishtinës dhe të interesohen për të gjitha çështjet e ndërlidhura me komunën dhe jo vetëm ato të komunitetit serb.   Ahmeti kërkoi nga deputetët që të angazhohen që sa më parë të kalojë ligji për kryeqytetin që tash e 8 vjet nuk kalohet nga Kuvendi edhe pse Kushtetuta e kërkon një gjë të tillë. /Telegrafi/