Shfaqet monodrama për Isa Boletinin në Boletin, aktori përcjell emocion të veçantë

Gjatë ditës së sotme është dhënë monodrama për heroin Isa Boletini e quajtur “Jam mirë kur a mirë Shypnia” nga aktori Adem Zhitopotoku.

Kjo monodramë që zgjati gjysmë ore u dha tek kulla e Isa Boletinit në Boletin të Komunës së Zveçanit, shkruan Telegrafi.

Përmes kësaj vepre artistike, paraqitet një natë kur heroi Isa Boletini po qëndronte vetëm në Durrës dhe tashmë princ Vidi kishte braktisur Shqipërinë dhe kishte shkuar në Rumani, derisa vendi ishte në gjendje të vështirë.

Aktori Adem Zhitopotoku në një prononcim për Telegrafin ka treguar më shumë lidhur me këtë monodramë.

“Kjo është një natë e gjeneral Isa Boletinit në Durrës, duhet të jetë 4 shtator 1914, kur mbreti i Shqipërisë me origjinë gjermane e braktisë Shqipërinë dhe shkon në Rumani. Shqipëria mbetet keq, është e pushtuar nga sllavët në të gjitha anët dhe gjeneral Boletini është njeriu që ka siguruar shëndetin, sigurinë dhe jetën e mbretit Vid për gjashtë muaj sa ai ka qëndruar në Durrës. Në momentin që mbreti i shtetit largohet, atëherë shteti mbetet në hallakamë. Kjo është një natë kur të nesërmen në mëngjes gjenerali duhet të vendosë nëse do të vazhdojë qëndrimin në Durrës, ku është grupi i “Haxhiqamilit” që e kanë luftuar gjithmonë princin Vid dhe kanë dashur ta rikthejnë sulltanin në Shqipëri, apo ta ndërrojë qytetin. Në momentin që e ndërron qytetin, ku të shkojë sepse vendi është në luftë, pra këto janë dilemat e gjeneralit. Gjatë kësaj nate, ai e mendon gjithë rrugëtimin që e ka pasur që nga fillimi”, ka thënë Zhitopotoku.

Aktori ka thënë se heroi Isa Boletini që nga mosha 15-vjeçare është nisur në rrugëtimin për çlirimin e Shqipërisë dhe ndërtimin e shtetit.

Meqenëse kjo monodramë u dha në Boletin, aktori shprehet se ky fakt e bëri më të veçantë gjithë procesin.

“Mungojnë dritat dhe gjërat tjera por është një lidhje tjetër shpirtërore kur ngado ku sillesh të duket sikur shpirti i gjeneralit Isa Boletini është bashkëprezent me ne”, ka përfunduar aktori.

I pranishëm në këtë monodramë ishte dhe Gazmend Boletini, stërnipi i heroit kombëtar, Isa Boletini.

Ai në një prononcim për Telegrafin ka thënë se ishin emocione të papërshkruara gjatë dhënies së monodramës që sipas tij, e njëjta kishte ringjallur kujtesën e kaluar.

“E falënderoj dhe përgëzoj aktorin sepse vendi ka nevojë që gjeneratat e reja duhet ta dëgjojnë të kaluarën sepse kjo na ka mbajtur me shekuj gjallë. Në kohët e fundit jemi angazhuar që t’i rikthejmë të bëmat e baballarëve të kombit sepse ata kanë qenë dhe do të jenë shembulli më i mirë i çështjes tonë kombëtare”, ka thënë Boletini.

Stërnipi i heroit është ndarë i kënaqur me përformancën e aktorit, Adem Zhitopotoku.

“Të luash rolin e Isës nuk ka qenë edhe shumë lehtë, prapë po e përgëzojë aktorin dhe të gjithë qytetarët që ishin pjesëmarrës në këtë monodramë”, ka përfunduar ai.

Ndërsa, aktori që luan rolin e Ismail Qemajlit, Bedri Selmani për shfaqjen e monodramës së kolegut në një prononcim për Telegrafin ka thënë se ishte origjinale dhe me emocione që përkasin ambientit.

“Ka komunikuar me shikuesit që e kanë përcjellë dhe kënaqësia e aktorit është komunikimi me publikun”, ka thënë Selmani.

Aktori ka thënë se fakti që monodrama u dha në vendlindjen e heroit kishte ndikuar që aktorit t’i jepte emocion ndryshe por sipas tij, Zhitopotoku është mishëruar me këtë rol. /Telegrafi/