Shembet një pjesë e murit e Fakultetit të Filologjisë, flasin nga Rektorati i UP-së

Komisioni mbikëqyrës i punimeve në kuadër të projektit “Drenazhimi, kanalizimi, ujësjellësi në Filologjik, FSHMN, Filozofik”, së bashku me kompaninë përgjegjëse, kanë dalë në terren si dhe kanë zhvilluar takimet e nevojshme për shembjen e një pjese të murit të objektit të Fakultetit të Filologjisë në Prishtinë, i cili gjendet në ndërtesën e njëjtë me Fakultetin e Shkencave Matematike-Natyrore.

Kështu thuhet në një përgjigje dërguar Telegrafit, nga Rektorati i Universitetit të Prishtinës.

Sipas përgjigjes së tyre të njëjtit do të përcjellin konkluzionet dhe propozimet e tyre për sanim të dëmeve të shkaktuara.

Lexo po ashtu Shembet një pjesë e murit e Fakultetit të Filologjisë

“Ju informojmë që komisioni mbikëqyrës i punimeve në kuadër të projektit ‘Drenazhimi, kanalizimi, ujësjellësi në Filologjik, FSHMN, Filozofik’, së bashku me kompaninë përgjegjëse, kanë dalë në terren si dhe kanë zhvilluar takimet e nevojshme. Të njëjtit do të përcjellin konkluzionet dhe propozimet e tyre për sanim të dëmeve të shkaktuara”, thuhet në përgjigjen e Rektoratit të UP-së.

Siç ka raportuar sot Telegrafi, është shembur njëra anë e ndërtesës së këtij fakulteti.

Në këtë objekt është po ashtu edhe dhoma e herbariumit, ku ruhen ekzemplarët e fakultetit të Bujqësisë, nga vitet e 60-ta. /Telegrafi/