Shefi i NATO-s drejt Turqisë – çfarë do të diskutojë ai me Erdoganin?

Presidenti turk Recep Tayyip Erdogan do të diskutojë zhvillimet e fundit në luftën Rusi-Ukrainë me Sekretarin e Përgjithshëm të NATO-s, Mark Rutte, gjatë vizitës së tij në Ankara, ka njoftuar një zyrtar turk.

Rusia goditi Ukrainën me një raketë të re balistike me rreze të mesme hipersonike të enjten në përgjigje të përdorimit të raketave amerikane dhe britanike nga Kievi, duke shënuar një përshkallëzim në luftën që filloi kur Moska filloi luftën me fqinjin e saj në shkurt 2022.

Bëhet e ditur se Turqia, anëtare e NATO-s, e cila ka dënuar pushtimin rus, thotë se mbështet integritetin territorial të Ukrainës dhe i ka ofruar Kievit mbështetje ushtarake, shkruan Reuters, përcjell Telegrafi.

Por Turqia, një fqinj i Rusisë dhe Ukrainës në Detin e Zi, gjithashtu kundërshton sanksionet perëndimore kundër Moskës, me të cilën ndan lidhje të rëndësishme të mbrojtjes, energjisë dhe turizmit.

Siç raportohet, Erdogan kundërshtoi një vendim të SHBA-së për të lejuar Ukrainën të përdorë raketa me rreze të gjatë për të sulmuar brenda Rusisë, duke thënë se kjo do të ndezë më tej konfliktin.

Ndryshe, gjatë takimit, Erdogan dhe Rutte do të diskutojnë gjithashtu heqjen e pengesave të prokurimit të mbrojtjes midis aleatëve të NATO-s dhe luftës së përbashkët të aleancës ushtarake kundër terrorizmit. /Telegrafi/