SHBA-të dhe Koreja e Jugut fillojnë stërvitjet më të mëdha ushtarake në vitet e fundit

Shtetet e Bashkuara dhe Koreja e Jugut kanë filluar stërvitjet e përbashkëta ushtarake, që po konsiderohen si më të mëdhatë në vitet e fundit.

Pritet që të tregohet fuqia ushtarake dhe të rriten edhe më shumë tensionet me Korenë e Veriut, e cila muajve të fundit po bën lëvizje çdo herë e më agresive, transmeton Telegrafi.

Stërvitjet ushtarake po quhen Ulchi Freedom Shield, dhe po interpretohet si porosi për aleatin se janë të vendosur të vazhdojnë stërvitjet e mëdha ushtarake, pasi që ishin shtyrë për kohë të pacaktuar duke i dhënë hapësirë marrëveshjes për armët bërthamore me Korenë e Veriut apo për shkak të COVID-19.

Detajet e operacionit nuk janë bërë të ditura, por më herët stërvitjet ushtarake përfshinin dhjetëra mijëra ushtarë dhe një numër të madh të aeroplanëve, luftanijeve dhe tankeve.

Në kumtesën e përbashkët të dy ushtrive thuhet se stërvitjet janë si kundërpërgjigje ndaj testimeve të shumta të raketave nga shteti fqinj – Koreja e Veriut.

Në stërvitje do të simulohen sulmet e përbashkëta, dërgimi i ndihmës, armëve dhe derivateve në njësitë më të angazhuara, si dhe demonstrohet shkatërrimi masiv i armëve.

Stërvijet e vitit 2019 ishin shtyrë pas samitit të parë të Donald Trumpit me liderin suprem të Koresë së Veriut, Kim Jong-un në Singapor.

Ky veprim i Trumpit ishte parë si tentim që ta bindë Kimin, që të heq dorë nga programi i tij i armëve bërthamore dhe të ndjekë rrugën diplomatike. /Telegrafi/