Seminari i përvjetorëve

Edhe në edicionin e 27-të të Seminarit ndërkombëtar të Gjuhës, letërsisë dhe kulturës shqiptare priten të organizohen referime të shumta shkencore të cilat do të startojnë nga data 18 dhe 19 gusht në Prishtinë. Ky Seminar do të sjellë në Prishtinë mysafirë të ndryshëm të cilët do të mbajnë tryeza shkencore si dhe do të mbahen edhe përvjetorë të rëndësishëm.

Kështu, do të përkujtohet 100 vjetori i Kongresit të Manastirit, 70 vjetori i vdekjes se Millosh Gjergj Nikollës – Migjenit dhe 100 vjetori i lindjes se filologut të njohur shqiptar, Eqrem Çabej. Nga referimet shkencore pritet që të kujtohet edhe 130 vjetori i Lidhjes se Prizrenit.

Drejtori i Seminarit, Imri Badallaj, ka thënë për “Express” se ka një numër të madh të interesuarish që do të marrin pjesë në Seminar të cilët do të paraqiten me kumtesat e tyre.

“Programi i këtij viti është mjaft i ngjeshur. Pas hapjes do të organizohen gjashtë ligjërata ku personalitete eminente nga Kosova dhe Shqipëria do t’i mbajnë në fusha të ndryshme – në fushën e gjuhësisë, letërsisë dhe kulturës në përgjithësi”, tha Badallaj.

“Kemi organizuar dy pasdite të referimeve, njëra i kushtohet 100 vjetorit të Kongresit të Manastirit dhe një pasdite tjetër do t’i kushtohen Lidhjes së Prizrenit”, ka thënë ai.
Pritet që në referimet për Kongresin e Manastirit të marrin pjesë edhe gjuhëtarë dhe letrarë, ndërsa në referimet për Lidhjen e Prizrenit do të prezantohen historianë nga vendi

Seminari ndërkombëtar, i Gjuhës, letërsisë dhe kulturës shqiptare organizohet nga Fakulteti i Filologjisë në Universitetin e Prishtinës në bashkëpunim me Fakultetin e Historisë dhe Filologjisë në Universitetin e Tiranës. Ai përkrahet financiarisht nga Ministria e Arsimit, Shkencës dhe Teknologjisë (MASHT) në Kosovë.