Sejdiu: Zgjidhja e çështjes së demarkacionit në interes të Kosovës

Ish-presidenti i Kosovës, Fatmir Sejdiu, njëherësh kryetar nderi i LDK-së, duke komentuar çështjen e demarkacionit, tha se kjo çështje duhet të zgjidhet sa më shpejt meqenëse është interes i vendit.

Në prag të shënimit të 10-vjetorit të pavarësisë së Kosovës, Sejdiu në RTK ka folur rreth çështjes së demarkimit të kufirit me Malin e Zi, çështjen e Gjykatës Speciale dhe rreth deklarimeve të fundit rreth vendosjes së flamurit shtetëror apo atij kombëtar.

“Mbase koha jonë ka qenë një kohë e idealizmit për të arritur një pikë kulmore. Unë kam udhëhequr ekipin e unitetit, dhe ndjehem me fat që kamë punuar me njerëz, pavarësisht se mund të ketë pasur mospajtime personale që janë shprehur brenda. Por në pjesën konceptuale kemi pasur një qëndrim dhe përveç kësaj kemi pasur një bashkëpunim të jashtëzakonshëm me faktorin ndërkombëtar”, tha Sejdiu, teksa është pyetur rreth çështjes së demarkacionit.

Sipas tij, pakoja e Ahtisaarit ka një provizion shumë të vogël rreth çështjes së demarkacionit dhe ka vetëm një formulë.

“Janë kufijtë e përcaktuar me Kushtetutën e vitit 1974 dhe gjendjen e para vitit 1999”, tha ai.

Duke kujtuar takimet që ka pasur me homologun e tij malazez gjatë kohës sa ka qenë në krye të shtetit, Sejdiu tha se “gjatë takimeve që kam pasur asnjëherë nuk është hapur nga ana e tij ky problem”.

Ai tha se faza se si është zhvilluar më vonë është shumë interesante dhe për këtë nuk ka informacione se si është ngritur deri aty problemi saqë ka ardhur deri të acarimi i raporteve.

Ish-presidenti i vendit tha se duhet shumë të shpejt të gjendet një zgjidhje për demarkacionin dhe ky është interes i vendit.

Sejdiu, ndërkaq, ka kërkuar që të respektohen si flamuri i shqiptarëve e edhe flamuri i shtetit të Kosovës.

“Janë çështje që duhet të ndahen dhe duhet të dihen: shteti dhe etnia. Askush s’ka të drejtë t’i thotë dikujt të mos përdor flamurin kombëtar, kurse simbolet shtetërore duhet të respektohen…”, ka thënë Sejdiu.

I pyetur rreth kohës kur ka dhënë dorëheqje nga posti i presidentit të vendit, Sejdiu tha se nuk është detyruar të japë dorëheqje, porse është tërhequr vetë.

“Ishte një mendim jo obligues i gjykatës kushtetuese… “, tha ai në RTK, duke shtuar se ka pasur ambicie personale të liderëve e politik, që të vijnë në postin e Presidentit, por që në këtë rast nuk ka përmendur emra.

Sejdiu ka treguar se në kohën kur ka qenë ai president nuk është përmendur Gjykata Speciale.

“Në kohën time nuk është folur për Gjykatën Speciale, është folur për zbardhje të rasteve… Ne kemi zhagitur vetveten dhe tash kemi një temë kaq të madhe… Unë s’do do të doja që ajo të ndodhë, do të doja të zbardhen raste…”, ka thënë Sejdiu.

Ai është shprehur se vetëm akti i Pavarësisë nuk mjafton dhe se ka shumë sfida.

Sipas tij, duhet të gjendet një formulë që e çon vendin përpara