Sindikata e Bashkuar për Arsim, Shkencë dhe Kulturë (SBAShK), ka dorëzuar sot në Kuvendin e Kosovës një peticion me 20,606 nënshkrime të mbledhura në kuadër të një nisme qytetare për ndryshimin dhe plotësimin e Ligjit për skemat pensionale.
Kryetari i SBAShK-ut, Rrahman Jasharaj tha se zhvilluan edhe takim me kryetarin e Kuvendit, Glauk Konjufca.
“Sapo dolëm nga takimi me kryetarin e Kuvendit dhe e njoftuam për iniciativën qytetare dhe e njoftuam se për një kohë të shkurtër kemi mbledhur 20 mijë e 606 nënshkrime për nisëm legjislative për ndryshimin dhe plotësimin e Ligjit për skemat pensionale”, tha Jasharaj.
Ai shtoi se Konjufca u premtoi që brenda kompetencave të tij, do të angazhohet që kjo nismë të shkon me kohë te organet gjegjëse, në mënyrë që sa më shpejt të kaloj në parlament.
Jasharaj u shpreh optimist se deputetët do t’i ofrojnë mbështetje kësaj nisme.
“Jemi të sigurt që deputetët e pozitës dhe opozitës do ta votojnë këtë nismë tonën pasi që kemi biseduar me shefat e grupeve parlamentare dhe nga të gjithë kemi marrë mbështetje”, tha ai.
Jasharaj tutje shtoi se “shpresojmë shumë që vitet e 90 do t’u kthehen si e drejt e garantuar punëtorëve të arsimit, ne po angazhohemi edhe për ata që u dëbuan dhunshëm nga puna”.
Kreu i SBAShK-ut më tej u shpreh se në këtë nismë është e përfshirë edhe që Qeveria dhe Parlamenti ti njohin edhe vitet 2000-2001 e deri në korrikun e vitit 2002 si kontributdhënëse, pra deri në momentin kur filloi së funksionuari Trusti Pensional.
Ndryshimet në Ligjin e skemave pensionale kanë të bëjnë me kërkesën që vitet e 90-ta dhe vitet pasuese deri kur ka filluar së funksionuari Trusti Pensional i Kosovës, të njihen si kontributdhënëse që do të ishte ndihmesë jo vetëm për të punësuarit e arsim, por edhe për gjithë të tjerët që të arrijnë vitet e duhura kontributpaguese dhe të gëzojnë pension të punës e jo të mbesin vetëm me pensionin e pleqërisë pas dekadave të kaluara në punë. /Telegrafi/
