Santos: Portugalia nuk është vetëm Ronaldo

Trajneri i kombëtares portugeze, Fernando Santos ka folur para sfidës me Kroacinë duke thënë se Portugalia nuk është vetëm Ronaldo, pasi të gjithë futbollistët kryejnë punën e tyre.

Në prag të përgatitjeve që kombëtarja portugeze po i bënë për përballjen me Kroacinë, trajneri Fernando Santos këmbëngul se Porutgalia nuk është vetëm Ronaldo.

Edhe pse në vitet e fundit përfaqësuesja iberike ka luajtur me modulin 4-3-3, tani me Santos rreshtimi ka ndryshur në klasik 4-4-2, me Ronaldon dhe Nanin në vijën e sulmit, ndryshim ky i bërë për sulmuesin e Realit, por që nuk la pa u pyetur nga gazetarët.

“Kjo qëndron, por vendimi për të aplikuar këtë vendosje nuk lidhet vetëm me Ronaldon. Portugalia nuk është vetëm Crtistiano Ronaldo, ndonëse më duhet ta pranoj ai është shumë i rëndësishëm për ne”, deklaroi Santos.

“Nëse e aktivizojmë Ronaldon me rreshtimin 4-3-3, nuk do të ketë mundësi të tregojë të gjithë potencialin e tij. Kjo është e paimagjinueshme. Nëse ai s’postohet në të majtë, skuadra ekspozohet ndaj problemeve në mbrojtje. Është më mirë që ai ta sulmojë mbrojtjen kundërshtare dhe të tentojë portën. Për karakteristikat që ka, ai ka nevojë për hapësira dhe liri veprimi”, përfundoi trajneri i Portugalisë.

Ndryshe, Portugalia do të përballen me Kroacinë në fazën e 1/8-ave, ndeshje kjo që do të zhvillohet sot në Lens. /Telegrafi/