Santos këmbëngul se Ronaldo nuk ka dashur kurrë të largohet nga kampi portugez dhe detajon bisedën me CR7

Trajneri i Portugalisë, Fernando Santos këmbëngul se Cristiano Ronaldo nuk ka shprehur kurrë ndonjë dëshirë për të lënë skuadrën e vendit të tij në Kupën e Botës “Katar 2022”.

Pasi u la në stol për përballjen e 1/8-tës me Zvicrën, dolën raporte që sugjeronin se Ronaldo kishte kërkuar të lirohej nga grupi – pasi kishte parë tashmë të prishur kontratën e tij me Manchester United në fillim të turneut.

Santos është i bindur se nuk ka pasur një diskutim të tillë, me Federatën Portugeze që tashmë ka konfirmuar se këto pretendime janë të kota dhe po ofrojnë një shpërqendrim të padëshiruar.

“Mendoj se është koha për ta lënë të qetë Ronaldon. Ai kurrë nuk më ka thënë se donte të largohej nga kombëtarja jonë dhe mendoj se është koha që ne të ndalemi me këtë bisedë, që të ndalemi me polemika”, ka thënë fillimisht Santos.

Ndërsa mohoi që Ronaldo të kishte kërkuar ndonjëherë të largohej, Santos i është dashur të zgjerojë arsyet e tij për lënien në bankë të pesë herë fituesit të Topit të Artë në fitoren 6-1 ndaj Zvicrës.

“Unë fola me të pas drekës në ditën e lojës dhe e ftova në zyrën time. Për arsye të dukshme Cristano nuk ishte shumë i lumtur për këtë pasi ai ka qenë gjithmonë lojtari titullar”.

“Ai më tha: “A vërtet mendoni se është një ide e mirë?”. Por, ne patëm një bisedë normale në të cilën unë shpjegova pikëpamjet e mia dhe natyrisht ai i pranoi ato. Ne patëm një bisedë të sinqertë dhe normale”, përfundoi trajneri i Portugalisë. /Telegrafi/