Sabit Geci: Asnjëherë në jetën time nuk kam kryer vrasje

Njëri nga ish-komandantët e UÇK-së, Sabit Geci, ka thënë se luftëtarët që e çliruan Kosovën tashmë janë duke fjetur, sepse nuk po bëjnë asgjë për t’i parandaluar argatët e Serbisë që punojnë 24 orë.

Geci thotë se është organizuar një grup kundër njerëzve të luftës dhe gjejnë dëshmitarë dhe u premtojnë atyre gjithçka.

“Familja ime është mësuar e shkreta të vuaj. Kjo është një vazhdimësi e Serbisë dhe argatëve të tyre që janë aktiv këtu. Nuk besoj që ka shumë, por janë shuma aktivë. Ne e kemi çliruar vendin dhe tash jemi duke fjetur – nuk jemi duke i parandaluar ata faqezinj që punojnë 24 orë”, tha Geci në emisionin Zona B në Klan Kosova.

“Kur më kanë arrestuar në vitin 2000, i futën disa nene të tmerrshme dhe më dënuan gjashtë vjet. Gjykata e Apelit i hoqi ato nene të tmerrshme, por dënimin e lanë të njëjtin”.

“Një personi që dëshmonte kundër meje i kam thënë: Po të garantoj se unë nuk të kam parë, por po të kisha parë unë ty me këtë biografi që ke, ti sot nuk ishte këtu para Trupit Gjykues. E kam në procesverbal këtë punë”, tha ai.

Ai thotë se argatët e Serbisë kanë qenë dhe vazhdojnë të jenë aktivë kundër luftëtarëve të UÇK-së.

“Janë organizuar një grup kundër njerëzve të luftës dhe gjejnë dëshmitarë dhe iu premtojnë gjithçka”.

“Asnjëherë në jetën time nuk kam kryer vrasje. Unë gjuhën e kërcënimit nuk e njoh fare. Për mua vetëm le ta flasin realitetin. Unë jam duke vuajtur nga shpifjet”, tha ai.

Sabit Geci, që është liruar me kusht ka treguar për gjendjen e tij shëndetësore që është edhe arsyeja se pse ai nuk është duke e vuajtur dënimin e tij në burg.

“Dukja ime është e mirë për hasmit. Unë jam bërë 20 herë operacion, derisa pesë herë minimum kam qenë 99 % i vdekur”.

“Në operacionin e fundit në Turqi kur kam dalë nga intensiva pas tri ditësh dhe ka ardhë ardh mjeku dhe më ka parë duke më shëtitur djali në korridor i ka vënë duart në kokë dhe më ka thënë ‘a je jashtëtokësor ti apo çka është puna jote?’.

“Vuajtjet të kalitin dhe të bëjnë edhe më të fortë se sa që je. Është njëlloj si trimëria. Nëse fillon të frikësohesh çmendesh nga frika, derisa nëse fillon të bëhesh trim shkon duke u bërë edhe më trim”.

Por, a ka qenë Sabit Geci prapa ndonjë grupi që ka bërë atentate ose vrasje në Kosovë?

“Unë kam nejt dhe kam pi kafe me këdo që më është ulur në tavolinë. Kam qenë njeriu më i thjeshtë ndër të gjithë shokët. Nuk i përkas asnjë grupi”.

Ai ka folur edhe për atë që është përfolur shumë shpesh – se ai ka marrë mijëra euro që të organizojë atentate.

“Nëse del një argument që unë kam marrë para prej dikujt për vrasjen e ndonjë personi unë i lidhem me krejt familjen”.

“Në jetën time nuk ka bërë askush aso muhabetesh me mua. Jo që janë frikësuar se unë flas sepse të gjithë shokët e dinë që unë nuk flas, por nuk kanë pasë arsye me më fut mua në ato muhabete”.

Ai ka thënë se në mesin e shumë dëshmitarëve që kanë qenë pjesë e procesit gjyqësor për të nuk ka qenë asnjë komandant lufte.

“Kam pasë plot dëshmitarë. Dëshmitarë nuk kanë ardhë komandantët, ish-shokët e mi kanë heshtur”.

“Heshtja është pajtueshmëri me atë që po ndodh. Kur një gjë i ndodh shokut tim dhe unë hesht dhe nuk flas, atëherë unë pajtohem me atë që po i ndodh atij”.

“Çdo herë kur vjen një mision aty nuk ka drejtësi. UNMIK-u dhe EULEX-i nuk kanë pasë drejtësi”.

“Vendimi është marrë që unë të dënohem me pesë vjet e gjysmë burgim. Kur kemi shkuar ta dëgjojmë dënimin që duhej të shpallej në orën 09:00, gjyqtari nuk ka ardhë deri në orën 16:00 sepse i kanë bërë presion që duhej të m’i jepte 38 vjet e gjysmë burgim”, tha Geci.