Sa zgjat gara dhe çfarë ndodh me demat në fund? PETA shpall një fushatë kundër këtij festivali në Spanjë

Çdo vit, midis 6 dhe 14 korrikut, në rrugët e ngushta të Pamplonas organizohen gara me dema

Çdo vit – me përjashtim të një periudhe trevjeçare gjatë pandemisë Covid – rrugët e Pamplonas në Spanjë mbushen me qindra njerëz dhe dhjetëra dema të zemëruar.

Ata të gjithë marrin pjesë në një garë që zgjat rreth dy ose tre minuta. Për atë periudhë kohore, qëllimi është të vrapohet 850 metra nga pika e fillimit nga vendndodhja e demave të Santo Domingos deri në arenën e demave, transmeton Telegrafi.

Faqja zyrtare kushtuar festivalit të Shën Ferminit shpjegon se si lindi kjo traditë:

“Njerëzit do të vraponin përpara demave për t’i joshur përpara. Me kalimin e kohës, ngjarja u bë e njohur për publikun e gjerë dhe burrat filluan të vraponin para demave, në vend që të qëndronin pas kafshëve, siç bëjnë gjithmonë rojtarët e demave”.

Megjithatë, shpesh ndodh që gara të zgjasë më shumë, por të rezultojë edhe me vdekje – që nga viti 1910, kanë ndodhur 16 vdekje.

Si duket Festivali i Shën Ferminit?

Festivali zhvillohet nga data 6 deri më 14 korrik çdo vit në Pamplona, Spanjë. Datat janë fikse dhe nuk mund të ndryshohen pavarësisht nga dita e javës. Aktiviteti nis me fishekzjarre spektakolare dhe përfundon me këngën “Pobre De Mí”.

Përveç vrapimit në mëngjes të demave nëpër rrugët e ngushta në Pamplona, gjatë kësaj periudhe organizohen edhe ngjarje të tjera tradicionale. Por ajo që është e detyrueshme është veshja me një kostum bardh e kuq dhe kënaqja në frymën festive me këngë, valle dhe verë.

E gjithë ngjarja po transmetohet nga televizioni shtetëror dhe vëzhguesit brohorasin nga ballkonet dhe pas gardheve prej druri përgjatë rrugëve me kalldrëma.

Gjithsesi, PETA e dënoi këtë traditë këtë vit ashtu edhe viteve të kaluara, ndërsa paralajmëroi nisjen e një fushate kundër festivalit.

“Sondazhet e opinionit publik në vendet që lejojnë ndeshjet me dema tregojnë se shumica e banorëve e kundërshtojnë atë. Lufta me dema në Festivalin vjetor të Shën Ferminit në Pamplona është e tmerrshme dhe duhet të marrë fund,” thuhet në faqen e tyre të internetit. Ata kanë publikuar edhe llogaritë në Instagram të matadorëve që do të therin kafshët pas garave.

/Telegrafi/