Rusia vazhdon të fshehë realitetin: Pamje të reja tregojnë koreano-veriorët të plagosur në spitale e të fshehur pas pemëve në vijën e frontit

Ushtarët e Koresë së Veriut janë filmuar duke sulmuar llogoret ukrainase ndërsa raportet dalin se trupat e Kim Jong-un kanë pësuar humbje të konsiderueshme.

Volodymyr Zelensky publikoi një seri videosh që shfaqin koreano-veriorët në fushën e betejës në Kursk dhe akuzoi Moskën se po përpiqej të “fshehte” numrin në rritje të viktimave.

Në pamjet me dron të shpërndara në rrjete sociale, trupat e Koresë së Veriut u panë të strehohen pas një peme.

Një video tjetër u shfaq për të treguar forcat ruse duke u përpjekur të fshehin praninë e homologëve të tyre koreano-veriorë, duke mbuluar fytyrat e tyre me maska ​​dhe duke ua djegur fytyrat të vdekurve.

“Rusia nuk po përfshin vetëm ushtarë të Koresë së Veriut në sulme kundër pozicioneve ukrainase, por gjithashtu po përpiqet të fshehë humbjet e këtyre njerëzve”, tha Zelensky.

Ai shtoi: “Rusët po përpiqen gjithashtu të djegin fytyrat e ushtarëve të vrarë të Koresë së Veriut”.

Një zyrtar i lartë ushtarak amerikan, duke folur në kushte anonimiteti, tha se këtë javë kishte pasur “disa qindra” viktima të Koresë së Veriut në Kursk, me ushtarë të “të gjitha rangjeve” në mesin e tyre, shkruan yahoonews, përcjell Telegrafi.

Lexo po ashtu Zelensky: Rusia po ua djegë fytyrat ushtarëve koreano-veriorë për të fshehur humbjet në fushëbetejë

Të martën, Oleksandr Syrskyi, komandanti i përgjithshëm i forcave të armatosura të Ukrainës, tha se Rusia tani po përdorte “në mënyrë aktive” trupat e Koresë së Veriut dhe se ato po përballonin humbje të mëdha.

Ndërkohë, të hënën, inteligjenca ushtarake e Ukrainës tha se të paktën 30 koreano-veriorë ishin vrarë ose plagosur në fundjavë në fshatrat e vijës së parë të Plekhovo, Vorozhba dhe Martynovka.

Në të njëjtën ditë, Pat Ryder, zëdhënësi i Pentagonit, konfirmoi se koreano-veriorët kishin hyrë në luftime në Kursk dhe kishin pësuar viktimat e tyre të para, “të vrarë dhe të plagosur”.

Ndryshe, këto ishin raportet e para zyrtare për viktimat e Phenianit që kur SHBA konfirmoi në fund të tetorit se rreth 10,000 ushtarë të Koresë së Veriut kishin hyrë në luftë.

Janë shfaqur video të tjera të ushtarëve të plagosur të Koresë së Veriut në spitalet ruse të veshur si civilë, në një përpjekje të dukshme për të fshehur përfshirjen e tyre dhe numrin e viktimave.

Ushtarët u filmuan duke duke çaluar nëpër korridorin e një spitali ushtarak në Kursk me rroba të thjeshta.

Ndërsa gjatë fundjavës, u zbulua se Rusia po përballej me probleme në komandimin e trupave të Koresë së Veriut për shkak të barrierave gjuhësore.

Sipas një raporti nga HUR, inteligjenca ushtarake e Kievit, një incident dyshohet se përfshinte ushtarë të Koresë së Veriut duke vrarë aksidentalisht tetë trupa ruse pas një problemi komunikimi.