RTK dhe KTV kërkojnë anulimin e vendimit nga Komuna e Prishtinës për mbylljen e rrugës për këto media

Ditë më parë Komuna e Prishtinës ka marrë vendim për mbylljen e qarkullimit të mjeteve motorike në një pjesë të rrugëve “Rexhep Luci” dhe “Qamil Hoxha” si dhe në rrugët e rrugicat të cilat kalojnë nëpër parkun e Universitetit të Prishtinës dhe Bibliotekës Kombëtare, e cila pritet të hyjë në fuqi nga 1 shtatori.

Ky vendim ka zgjuar reagime të shumta edhe për punëtorët e Radio Televizionit të Kosovës (RTK) si dhe Kohavisionit (KTV) të cilët kërkojnë anulimin e këtij vendimi.

Drejtori i Radio Kosovës 1 dhe 2 në RTK, Arsim Halili ka kërkuar që ky vendim të shfuqizohet, pasi sipas tij cenon funksionimin e RTK Radios, si transmetues publik, në qarkullimin e lirë të gazetarëve dhe personave me nevoja të veçanta, si dhe cenon lirinë e medies dhe interesin e publikut për të qenë i informuar.

Halili këtë kërkesë e ka bërë publike në rrjetin e tij social në Facebook duke kërkuar nga i pari i Prishtinës që ta marr parasysh shqetësimin e tyre.

“Duke shprehur konsideratën time, ju lus që konform kompetencave tuaja ta shfuqizoni këtë vendim dhe të mundësoni funksionimin normal të RTK-së, si Transmetues Publik pasi në këtë mënyrë mbroni interesin publik dhe të drejtën ligjore të taksapaguesve për të qenë të informuar”, ka shkruar Halili.

Edhe drejtoresha e KTV-së, Flaka Surroi ka reaguar ndaj këtij vendimi për të cilin ka thënë se “Gazetarët dhe kameramanët e KOHËS do të privohen nga e drejta për t’i shfrytëzuar mjetet e tyre të punës që të mund ta përmbushin misionin e tyre”.

Ndërkaq, ndaj këtij vendimi kishte reaguar edhe Instituti i Kosovës për Drejtësi (IKD).

Ata përmes një reagimi për media kishin thënë se e kanë parasysh rëndësinë e ndërmarrjes së reformave për rregullimin urban të Kryeqytetit, dhe se këto çështje hyjnë në kuadër të diskrecionit të Komunës së Prishtinës dhe këtë duhet ta bëjë me ekspertët e fushës.

Mirëpo, sipas tyre këto reforma nuk duhet të jenë pa arsyetim ligjor në atë mënyrë që të cenojnë të drejtat e qytetarëve.

Lexo po ashtu IKD i kërkon Ramës anulimin e vendimit për mbylljen e disa rrugëve në Prishtinë

Për më tepër IKD thotë se vendime të kësaj natyre që prekin një numër të madh të qytetarëve domosdoshmërisht duhet të shoqërohen me konsultim publik.

Ndryshe, pas publikimit të vendimit, kryetari i Komunës së Prishtinës, Përparim Rama më 23 Gusht 2023 në rrjetin e tij social “Facebook” kishte publikuar një status përmes të cilit pati sqaruar vendimin e nxjerrë.

“Ky vendim është marrë me qëllim të realizimit të planit rigjenerues të këtyre hapësirave publike, në konsultim me Universitetin e Prishtinës dhe Bibliotekën Kombëtare, pasi këto pjesë janë duke u përdorur si parkingje dhe bllokojnë shfrytëzimin e këtyre hapësirave nga të gjithë qytetarët”, ka shkruar Rama. /Telegrafi/