“Rrezikohen padrejtësi të reja në rigjykimin e rastit Monstra”

Ekspertët vlerësojnë se aktakuza e njëjtë në rigjykimin për rastin “Monstra” rrezikon padrejtësi të reja ndaj të akuzuarve. Sipas ish prokurorit Aleksandër Nakov, mos ndryshimi i aktakuzës përbënë shkelje të Kodit Penal. Nakov shton se me aktakuzë të tillë dhe pa përfshirjen e PSP-së nuk mund të pritet rigjykim i drejtë.

“Tani jemi në situatë kur lëndën e përfaqëson Prokuror tjetër, pra Naum Panovski. Megjithatë, vetë qëndrimi i organit akuzës në të njëjtën aktakuzë për mua përbën shkelje dhe padrejtësi. Jam i bindur se atë lëndë duhet ta merr PSP-ja por fillimisht duhet pritur miratimi i Ligjit për dëshmitarët e mbrojtur dhe me këtë të arrihet zbardhja e rastit”, tha ish-prokurori Aleksandër Nakov.

I pyetur nëse Prokuroria Publike u gjet e pa përgatitur ndaj rigjykimit të rastit “Monstra”, Nakov shton se ky institucion po vuan pasojat e prokurores Gordana Geshkovska.

Rigjykimi i “Monstrës” filloi më 12 shkurt. Prokurori Naum Panovski mbrojti të njëjtën aktakuzë, gjegjësisht atë për terrorizëm. Seanca e parë u anulua për shkak të mos përfshirjes së të akuzuarit Sami Luta në akuzë bashkë me të akuzuarit e tjerë.

Rasti po rigjykohet në mungesë të dy të akuzuarve Alil Demiri dhe Afrim Ismailoviq. Mbrojtja në rigjykim fillimisht do të kërkojë veturën e dyshimtë Opel Omega, duke pritur në të njëjtën kohë që Specialja të zbardh të vërtetën e dëshmitarit të mbrojtur në këtë rast.

Më 24 nëntor të vitit kaluar më kërkesë të Prokurorisë Publike mbi dyshimet e hedhura ndaj akuzës për terrorizëm dhe mundësisë për rrethana të reja që mund të burojnë nga bisedat e përgjuara, Gjykata Supreme unanimisht vendosi për kthimin e lëndës në shkallën e parë. Për vrasjen e pesëfishtë në liqenin e Smillkovës në vitin 2012 me burg të përjetshëm u dënuan gjashtë persona: Alil Demiri, Haki Aizir, Fejzi Aziri, Sami Luta, Afrim Ismajloviq dhe Agim Ismajloviq./alsat/