Rregullatori i Kalifornisë po i shqyrton pretendimet e Tesla-s për sistemin vetë-drejtues të makinave, kjo ka çuar që njerëzit të besojnë se automjeti vozitet pa shofer

Një rregullator i Kalifornisë tha të hënën se po e shqyrtonte rastin nëse Tesla Inc, shkeli rregulloret duke promovuar në mënyrë të gabuar sistemet e tij të avancuara të ndihmës për shoferin si sisteme “vetë-drejtuese të plota”.

Sipas medieve të huaja, përcjell Telegrafi, karakteristikat e asistentit të shoferit të Tesla-s, të përshkruara si “autopilot” ose sistem “vetë-drejtues i plotë”, janë nën vëzhgim në rritje pas një serie aksidentesh dhe videove në internet të makinave Tesla duke u vozitur nga askush në vendin e shoferit.

Tesla thotë në faqen e saj të internetit që tiparet nuk e bëjnë automjetin të pavarur, por termi FSD (full self-driving) apo sistem vetë-drejtues i plotë, përdoret gjerësisht nga shefi ekzekutiv i Tesla-s, Elon Musk, i cili ka mbi 50 milionë ndjekës të Twitterit.

Lexo po ashtu Tesla thotë se makinat me teknologji të plotë ‘vetë-drejtuese’ mund të mos arrihen në fund të vitit

Grupet e Konsumatorëve dhe ekspertët e kanë kritikuar kompaninë për ‘mashtrimin’ e konsumatorëve për të besuar se makina mund të vozitet vetë pa siguruar një sistem adekuat të monitorimit të shoferit për të parandaluar keqpërdorimin e sistemit, duke kontribuar në aksidente fatale.

Një shofer makine i Tesla-s që vdiq në një aksident të fundit në Kaliforni, kishte lavdëruar tiparet e sistemit “vetë-drejtues të plotë”, të prodhuesit të makinave dhe kishte postuar video si duket duke vozitur makinën pa duart e tij në timon. /Telegrafi/