Rrahja në diskotekën e Pejës, Prokuroria dënon ashpër kërcënimet ndaj Shkodran Nikçit

Zyra e Kryeprokurorit të Shtetit (ZKPSH) ka dënuar fuqishëm kërcënimin e bërë ndaj Zyrtarit të Lartë për Komunikim me Publikun në Prokurorinë Themelore të Pejës, Shkodran Nikçi.

Ky kërcënim vjen si pasojë e prononcimeve zyrtare të Nikçit lidhur me veprimet që Prokuroria e Shtetit ka ndërmarrë për rastin e rrahjes në një diskotekë në Pejë, ku ishin të përfshirë shtetas të Republikës së Shqipërisë.

Në reagimin e ZKPSH, theksohet se Prokuroria e Shtetit, në bashkëpunim me institucionet tjera ligjzbatuese të Kosovës dhe autoritetet shqiptare, do të ndërmarrë të gjitha masat ligjore të nevojshme për të trajtuar me seriozitet të lartë këtë çështje. Synimi është që kërcënuesi të identifikohet dhe të sillet para drejtësisë sa më shpejt të jetë e mundur.

Kërcënimi ndaj një zyrtari të tillë ngre shqetësime të thella për sigurinë dhe integritetin e funksionarëve publikë që janë të angazhuar në zbatimin e ligjit dhe mbrojtjen e interesave të qytetarëve.

ZKPSH ka ritheksuar vendosmërinë e saj për të mbrojtur stafin e saj nga çfarëdo forme e presionit apo kërcënimit dhe për të garantuar që puna e tyre të kryhet pa pengesa.

Rasti i rrahjes në diskotekë, ku u përfshinë shtetas shqiptarë, ka tërhequr vëmendjen e opinionit publik dhe institucioneve përkatëse, duke sjellë në fokus nevojën për bashkëpunim të ngushtë mes Kosovës dhe Shqipërisë për trajtimin e rasteve të ndërlidhura me kriminalitetin dhe rendin publik.

Prokuroria e Shtetit ka siguruar publikun se nuk do të tolerojë asnjë formë të cenimit të sigurisë së zyrtarëve të saj dhe se drejtësia do të vihet në vend në mënyrë të plotë dhe të paanshme./Telegrafi/