Rindërtimi dhe rimëkëmbja e Ukrainës do të kushtojë 411 miliardë dollarë, vlerëson Banka Botërore

Nevojat për rindërtim dhe rimëkëmbje të Ukrainës janë rritur në 411 miliardë dollarë, ka thënë Banka Botërore.

Vlerësimi, i bërë së bashku nga qeveria e Ukrainës, Banka Botërore, Komisioni Evropian dhe Kombet e Bashkuara, është një rritje nga 349 miliardë dollarë të vlerësuar në një raport të publikuar në shtator, përcjell Telegrafi.

Vlerësimi i fundit pret që Kievi të kërkojë 14 miliardë dollarë për investime kritike dhe prioritare për rindërtimin dhe rimëkëmbjen në vitin 2023.

“Infrastruktura e energjisë, strehimi, infrastruktura kritike, ekonomia dhe çminimi humanitar janë pesë prioritetet tona për këtë vit”, ka thënë kryeministri i Ukrainës, Denys Shmygal në një deklaratë të mërkurën.

Ai shtoi se një pjesë e punës së rindërtimit tashmë është kryer.

Por Shmygal paralajmëroi se “sasia e dëmit dhe nevojave për rikuperim aktualisht nuk përfshin të dhëna për humbjen e infrastrukturës, banesave dhe bizneseve në territoret e pushtuara”.

“Kur forcat e mbrojtjes t’i lirojnë, autoritetet do të fillojnë punën e restaurimit në këto territore”, ka thënë më tej ai.

Raporti thoshte se vlerësimet “duhet të konsiderohen si minimale pasi nevojat do të vazhdojnë të rriten për sa kohë që lufta të vazhdojë”.

Kështu, dëmet e drejtpërdrejta të ndërtesave dhe infrastrukturës arrijnë në më shumë se 135 miliardë dollarë. /Telegrafi/