Rikthehet futbolli në Kosovë, Prishtina pret Drenicën në kuadër të Kupës – Armend Thaqi pret fitore

Me ndeshjen gjysmëfinale të Digitalb Kupës së Kosovës ndërmjet Prishtinës dhe Drenicës, rifillon sërish futbolli.

Pas një pauze më të gjatë se dy muaj, klubet tona rikthehen sërish në fushën e lojës, ndërsa ndeshja e parë zhvillohet të martën (nesër)  në stadiumin “Fadil Vokrrit” nga ora 18:00.

Prishtina dhe Drenica në këtë edicion janë takuar në dy ndeshje kampionale, 0:0 në Prishtinë dhe 3:1 fituan bardhekaltrit në “Bajram Aliu” të Skenderajt.

Prishtina dhe Drenica nga viti 2000 kur “kuqezinjtë” u inkuadruan në Superligë janë ndeshur plot 54 herë.

Bilanc pozitiv ka Prishtina me 27 fitore, 11 barazime dhe 16 fitore për drenicasit, ndërsa prishtinasit kanë goldallim më të mirë me +30, 80:50.

Prishtina në gjashtë ndeshjet e fundit përball Drenicës ka fituar pesë ndeshje.

Armend Thaqi: Duam finalen

Kapiteni i Prishtinës, Armend Thaqi, ka folur për ndeshjen dhe rikthimin pas bllokimit nga pandemia coronavirus.

“Po fillojmë sërish pas një pauze jo të dëshiruar nga të gjithë ne futbollistët, mirëpo u përballëm me pandemi globale duke shpresuar se tani më e kemi tejkaluar. I kthehemi ndeshjes së parë kundër një kundërshtari të vështirë siç është Drenica”.

“Tradicionalisht vuajmë kundër Drenicës, sepse kanë ekip të mirë dhe lojë të rrjedhshme tani e disa vite rresht. Mirëpo, ne nuk kemi rrugë tjetër, të hyjmë në ndeshje për ta mposhtur lojën e tyre dhe të arrijmë rezultat sa më pozitiv për ndeshjen e kthimit. Të gjithë e din synimin tonë që të arrijmë finalen me çka besoj se do t’i afroheshim shumë garave ndërkombëtare, pra nëse vije puna edhe nëpërmjet Kupës”, ka thënë kapiteni, Armend Thaqi. /Telegrafi/