Shqipëria vijon të tërheqë vëmendjen e turistëve të huaj, e duket se këtë vit numri i vizitorëve që do të presë vendi ynë do të tejkalojë vitin e kaluar.

Kryeministri i Shqipërisë Edi Rama tha se vetëm në katër muajt e parë të këtij viti, 867 mijë vizitorë erdhën në vendin tonë, duke shënuar një rritje prej 60 mijë vizitorësh, krahasuar me të njëjtën periudhë të një viti më parë.

“Nga liqenet alpine te lagunat, nga pyjet shekullorë te Vjosa, lumi i fundit i egër në Europë, Shqipëria po bëhet gjithnjë e më shumë destinacioni i preferuar për dashamirësit e natyrës dhe aventurës”, shkruan Rama.

Viti i kaluar shënoi një shifër rekord prej 11.7 milionë turistësh që vizituan Shqipërinë, ndërsa këtë vit pritshmëritë janë edhe më të larta. Gjithnjë e më shumë, mediat e huaja po i kushtojnë artikuj bukurive natyrore të Shqipërisë, traditave dhe kulturës, duke e konsideruar vendin tonë si një destinacion që duhet vizituar.

ShqipëriLajme