Qytetarët nga Tetova ankohen për tarifa më të larta komunale, komuna i këshillon që të harmonizojnë të dhënat

Pasi kompania sllovene ka marrë përsipër menaxhimin e mbeturinave në Tetovë, qytetarët ankohen për fatura më të larta.

“Kjo nuk është Austri që të vijnë këto lloj faturash, do marr fatura edhe nga Austria dhe të bëjmë një krahasim”, thuhet në një nga komentet e publikuara në rrjetet sociale.

Komuna e Tetovës njofton se nga ky muaj faturat e shërbimeve komunale do t’i lëshojë kompania e re, andaj nëse qytetarët marrin shuma më të larta duhet të drejtohen në objektet e NKP “Tetova” në Pazarin e Gjelbërt ose në kompaninë “Zaubermacher” në Palçisht për të harmonizuar të dhënat.

Fatura e “Zaubermacher” është për të gjitha shërbimet komunale, përkatësisht për menaxhimin e mbeturinave komunale, mirëmbajtjen e hapësirave publike dhe gjelbërimit, si dhe furnizimin me ujë të pijshëm dhe kullimin e ujërave atmosferike dhe të zeza.

“Pas ristrukturimit të ndërmarrjes komunale të Tetovës dhe dhënies së koncesionit për menaxhimin e mbeturinave komunale, ju njoftojmë se nga ky muaj për herë të parë do të lëshohen faturat e kompanisë së re “Saubermacher”. Ju njoftojmë se pavarësisht se ka ndryshuar metodologjia e llogaritjes së mbetjeve, nuk ka rritje të çmimit për njësi. Të gjithë qytetarët të cilët kanë marrë fatura më të larta se ato të mëparshmet duhet të kontaktojnë zyrat që ndodhen në Tregun e Gjelbër në Tetovë si dhe në hyrje të fshatit Palçishtë, për të harmonizuar të dhënat e tyre në mënyrë që kompania të bëjë pagesën reale”, thuhet në letrën e sotme nga Komuna e Tetovës.

Qytetarët, nëse nuk janë të kënaqur me përgjigjen e kompanisë, do të mund të kontaktojnë zyrat e Komunës së Tetovës.

“Ne si komunë do të formojmë një komision të posaçëm që do të hetojë çdo rast të paraqitur dhe do të gjejë një zgjidhje që do të jetë në interesin tuaj. Duke marrë parasysh gjendjen e vështirë financiare të NKP Tetovë të akumuluar ndër vite, kërkojmë nga qytetarët që rregullisht të paguajnë faturat për shërbimet komunale, nëse dëshirojnë të kenë mjedis të pastër dhe furnizim të rregullt me ​​ujë të pijshëm”, thuhet në njoftimin e zyrtar nga Marrëdhënieve me Publikun.

Kompania austriako-sllovene “Zaubermacher” merr pjesë në partneritet publiko-privat me Komunën e Tetovës në fushën e menaxhimit të mbeturinave. Deri më tani janë vendosur kontejnerë dhe tabela të reja informuese me emrin “Saubermacher”.