Qorrolli: Para demarkacionit duhet të bëhej shënjimi i kufirit

Vigan Qorrolli, analist dhe njohës i çështjeve të integrimit europian ka thënë, në “Interaktiv” të KTV-së, se para demarkacionit, duhej të bëhej delimitimi, shënjimi i kufirit, me Malin e Zi dhe se Gjykata e Arbitrazhit është rruga më e duhur për t’u ndjekur.

“Nuk ka më toka të askujt, që nga luftërat, nuk ka më toka të askujt. Arbitrazhi rruga më e duhur që duhet ndjekur. Delimitimi, shënjimi i kufirit,është dashur të bëhet si fazë e parë, e kjo nuk është bërë”, ka thënë Qorrolli duke shtuar se edhe përcaktimi i kufijve me elementin e kadastrave nuk ka qenë në rregull, transmeton Koha.net.

Ndërsa notën e protestës nga Mali i Zi për autoritetet e Kosovës, ai e ka quajtur të ngutshëm ngaqë ai kufi ende nuk është zyrtar sepse kufiri nuk caktohet njëanshëm.

Ai ka thënë se Komisioni për Punë të Jashtme i BE-së vetëm ka bërë një hap procedural duke i rekomanduar Parlamentit Europian që t’i ratifikojë vizat.

“Është një vendim preliminar, procedurë para ratifikimit, komision për punë të jashtme nënkupton se proceduralisht duhet t’i rekomandojë Parlamentit Europian që ta merr në dorë liberalizimin e vizave. Krimi, korrupsioni dhe demarkacioni duhet të kryhen para ratifikimit të Parlamentit Europian”, ka thënë Qorrolli.