Pyjet halore të Dukagjinit po dëmtohen nga insektet

Një pjesë e pyjeve halore në rajonin e Dukagjinit, janë dëmtuar nga insektet që shkaktojnë sëmundjen e këtyre pyjeve.

Zyrtarë të Agjencisë së Pyjeve të Kosovës, kanë thënë se sëmundja po shkaktohet nga tenja e pishës, që paraqet një kërcënim serioz për masivet pyjore të vendit.

Pyjet e Kosovës janë thesari më i çmuar i vendit duke ju falenderuar relievit, klimës dhe hidrografisë, që i bënë ato më të çmuara dhe më atraktive. Insekti i tenjës së pishës (procesionare) po ndikon në tharjen e njëpasnjëshme të pishave.

Menderes Ibra, Drejtor i Drejtoratit për Menaxhimin e Pyjeve në Agjencinë e Pyjeve të Kosovës sqaron për Radio Kosovën se në rajonin e Dukagjinit tenja e pishës ka bërë dëme, por jo në përmasa të mëdha ashtu sikurse në Shqipëri. Ibra thotë se ka pasur disa raste të izoluara por që tenja e pishës është më e theksuar.

“Kemi raste të izoluara. Kemi sipërfaqe të prekura edhe nga një dëmtues tjetër por tenja e pishës është më shumë e paraqitur. Në komunën e Gjakovës, të Junikut, Deçanit, një pjesë në Suharek dhe Prizren. Por, aktualisht këto nuk paraqesin shqetësim serioz”, tha ai.

Vitet e kaluara janë ndërmarrë disa operacione për pastrimin në mënyrë mekanike të tenjës së pishës, e që rezultatet kanë qenë të pakta. Menderes Ibra thotë se zhdukja e tenjës së pishës është mjaft komplekse.

“Ajo luftohet në tri mënyra. Është mënyra mekanike fizike largimi i pjesëve të drurit të kalbur dhe ndezja e tyre bashk me larvat e insekti. Nese sipërfaqet janë të mëdha trajtimi bëhet me pesticide. Ekziton edhe një form e re e cila ka filluar të zbatohet në disa shtet fqinje veçanarisht në Turqi e që është mënyra biologjike e luftimit të sa. Pra, është kultivuar një insekt i cili është armik biologjik i tenjës së pishës”, shtoi ai.

Pyjet në Kosovë kanë një florë e faunë të gjerë që ka rëndësi për të gjithë rajonin e Ballkanit. Flora e Kosovës përfaqëson rreth 25% të florës së Ballkanit dhe asaj të Evropës. Rajoni me shumëllojshmërinë më të lartë janë Malet e Sharrit dhe Alpet Shqiptare.