Putini do të vizitojë një anëtar të NATO-s, për herë të parë që nga fillimi i agresionit në Ukrainë

Presidenti rus Vladimir Putin do të vizitojë Turqinë më 12 shkurt për të takuar homologun e tij Recep Tajip Erdogan.

Dhe ky do të jetë udhëtimi i parë i liderit rus në një aleat të NATO-s që nga pushtimi i Ukrainës nga Moska në shkurt të vitit 2022.

Sipas mediave të huaja, përcjell Telegrafi, kjo vizitë vjen në kohën kur mundësia e Putinit për të udhëtuar jashtë vendit ka qenë e kufizuar që nga marsi i vitit të kaluar kur Gjykata Ndërkombëtare Penale (ICC) lëshoi një urdhër arresti kundër tij për deportimin e supozuar të fëmijëve ukrainas në Rusi, një krim lufte.

Rusia e mohoi akuzën, por tha se ishte ligjërisht i pavlefshëm në çdo rast, sepse Rusia nuk është anëtare e ICC.

Turqia gjithashtu nuk është palë e Statutit të Romës të ICC-së, kështu që Putini mund të udhëtojë në Turqi pa frikë se do të arrestohet sipas urdhër-arrestit.

Turqia, e cila ndan një kufi detar me Ukrainën dhe Rusinë në Detin e Zi, është përpjekur të mbajë lidhje të mira me të dy vendet që nga pushtimi në shkallë të plotë i Ukrainës nga Moska.

Ajo ka ofruar mbështetje ushtarake për Kievin dhe ka shprehur mbështetje për integritetin e saj territorial, por gjithashtu kundërshton sanksionet ndaj Rusisë.

Më herët të mërkurën, Turqia dhe Ukraina nënshkruan një marrëveshje për të lejuar firmat turke të ndërtimit të marrin pjesë në rindërtimin e infrastrukturës ukrainase të dëmtuar nga lufta me Rusinë.

Turqia ka lidhje të ngushta ekonomike me Rusinë, veçanërisht në turizëm, furnizime me gaz, drithëra dhe tregti të tjera bujqësore, që i bëjnë vendet perëndimore të shqetësuara.

Megjithatë, të dy kanë qenë gjithashtu në mosmarrëveshje për konfliktet në Siri dhe Libi, ku mbështesin palët kundërshtare, si dhe për tensionet midis Azerbajxhanit dhe Armenisë në Kaukazin e Jugut. /Telegrafi/