Publikohen imazhe të papara të Jupiterit nga teleskopi James Webb

Njerëzit anembanë botës ishin në gjendje të shihnin grupin e parë të fotografive me ngjyra të marra nga teleskopi hapësinor James Webb (JWST) i NASA-s. Por ajo që entuziastët e hapësirës arritën të gërmojnë mes fotove dhe dokumenteve të publikuara dhe që mund të ketë kaluar pa u vënë re nga shumëkush, janë dy foto krejtësisht të reja të Jupiterit.

Imazhet magjepsëse të gjigantit të gazit, më i afërti me Tokën në sistemin tonë diellor, u kapën nga teleskopi James Webb teksa po i nënshtrohej testimit. Imazhet tregojnë unazat e Jupiterit si dhe tre hënat e tij – Europa, Thebes dhe Metis. Hija e Evropës mund të shihet edhe në foton e etiketuar F212N, pikërisht pranë Njollës së Madhe të Kuqe. Njolla e Madhe e Kuqe është një sistem stuhish afatgjatë i vendosur 22 gradë në jug të ekuatorit të Jupiterit, duke prodhuar erëra deri në 432 km/h.

Lexo po ashtu Teleskopi hapësinor James Webb, nga zbulimi i ujit në ekzoplanetin WASP 96 b - e deri të ylli që po vdes dhe grupi i galaktikave

Imazhet e reja të Jupiterit janë marrë me një kamerë infra të kuqe (NIRCam), dhe secila përdor një filtër të ndryshëm për të nxjerrë në pah gjatësi vale të veçanta të dritës. Raporti tha se imazhet “treguan se JWST mund të gjurmojë objektivat në lëvizje edhe kur ka dritë të shpërndarë nga planeti i ndritshëm Jovian”. Jovian do të thotë “si Jupiteri” dhe përshkruan Jupiterin, Saturnin, Uranin dhe Neptunin, raporton skynews.

NASA ka zgjedhur nëntë objektiva për të testuar aftësinë e teleskopit për të gjurmuar objektet që lëvizin shpejt. Instrumente të tjera në bord të testuara përfshijnë imazherin me infra të kuqe afër, spektrografin pa çarje (NIRISS) dhe instrumentin me infra të kuqe të mesme (MIRI), të cilët zbulojnë dhe stabilizojnë gjatësi vale të ndryshme.

Jupiteri ishte objektivi më i ngadalshëm, por të gjitha testet ishin të suksesshme. Këto imazhe tregojnë gjithashtu aftësinë e tij për të kapur detaje të tilla si unazat dhe hënat rreth planetëve të shndritshëm.

Raporti thotë se teleskopi hapësinor James Webb është projektuar “për të mundësuar përparime thelbësore në kuptimin tonë të formimit dhe evolucionit të galaktikave, yjeve dhe sistemeve planetare. Tani e dimë me siguri që kështu do të jetë”.

Lexo po ashtu Zbulohet imazhi i parë nga “James Webb”, teleskopi hapësinor më i madh dhe më i fuqishëm në botë

Publikimi i fotove shënon fillimin e punës shkencore me Webb, teleskopin më të madh dhe më të fuqishëm të lëshuar në hapësirë. Teleskopi James Webb u lëshua në 25 dhjetor me një raketë Ariane nga Qendra Hapësinore Kourou e Agjencisë Evropiane të Hapësirës në Guajanën Franceze.

Shkencëtarët shpresojnë se fotot e teleskopit do të japin një pasqyrë të periudhës menjëherë pas Big Bengut rreth 13.8 miliardë vjet më parë. Zhvillimi i Webb zgjati rreth 30 vjet dhe kushtoi rreth 10 miliardë dollarë. Ai është pasardhësi i teleskopit Hubble, i cili ka qenë në përdorim për më shumë se 30 vjet. /Telegrafi/