Promovohen libra për fëmijët me pengesa në shikim

Projekti për fëmijët me pengesa në shikim, i përkrahur nga Agjencia amerikane për zhvillim ndërkombëtar (USAID) dhe Fondacioni ndërkombëtar i klubeve Lions (LCIF), sot promovoi 120 libra për shkollë fillore, klasa 1-9, në gjuhën shqipe dhe maqedone, të adaptuara dhe të shtypura në alfabetin Braille për nxënës me pengesa në shikim, përcjell Telegrafi Maqedoni.

Ngjarja u mbajt në shkollën shtetërore për fëmijë me shikim të dëmtuar “Dimitar Vllahov” në Shkup.

“Këta libra në alfabetin Braille do të ju ndihmojnë nxënësve me shikim të dëmtuar, që të mund plotësisht të përfshihen në jetën shkollore dhe të përfitojnë dituri dhe aftësi që janë të domosdoshme që ata të jenë qytetarë aktivë dhe produktivë. Nëpërmjet këtij materiali të ri, mijëra njerëz do të kenë qasje në botën ku nuk kishin qasje deri më tani dhe unë jam krenar që USAID është pjesë e kësaj nisme”, u shpreh David Atteberry, përfaqësues i USAID në Maqedoni.

Projeti për fëmijët me pegesa n shikim ka për qëllim ngritjen e kualitetit dhe qasjen e arsimit për këto fëmijë. Projekti përqëndrohet në arsim duke botuar libra në alfabetin Braille në gjuhët vendore, si dhe detetktim të hershëm të dëmtimeve në shikim duke organizuar kampanja për kontrolle të syve për fëmijët e moshës parashkollore./Telegrafi/