Prokuroria Publike paraqet ankesë pas refuzimit të masës së paraburgimit për dyshuarit në rastin e M-NAV

Prokuroria Publike sot ka shpallur se do të paraqesë ankesë kundër vendimit të gjyqtarit të procedurës paraprake nga Gjykata Themelore Penale Shkup, i cili ka refuzuar propozimin për caktimin e masës së paraburgimit për katër të dyshuar në rastin e rrezikimit të sigurisë së komunikacionit ajror në M-NAV. Gjyqtari ka vendosur masë të kujdesshme për të dyshuarit, duke shqiptuar masa të ndryshme për kufizimin e lëvizjes dhe komunikimit.

Ngjarja ka ndodhur pas incidentit në zyrat e M-NAV, ku të dyshuarit, përfshirë Bekim Neziri, ish-ministër dhe kryetar i degës së BDI-së, akuzohen për rrezikim të sigurisë së komunikacionit ajror. Ata janë përfshirë në një sulm fizik ndaj punonjësve të M-NAV, duke penguar shërbimet në Aeroportin Ndërkombëtar të Shkupit.

Lexo po ashtu Prokuroria kërkon paraburgim për Bekim Nezirin dhe tre persona tjerë

Prokuroria Publike ka shprehur shqetësimin për rrezikun e arratisjes dhe ndikimin në procedurë nga ana e të dyshuarve, duke dorëzuar propozim për masën e paraburgimit. Megjithatë, gjyqtari i procedurës paraprake ka refuzuar propozimin dhe ka caktuar masën e kujdesit për të dyshuarit.

Në të njëjtën kohë, tensionet janë rritur në M-NAV, pas shpalljes së shkarkimit të gjithë menaxhmentit nga Qeveria. Kryetari i Sindikatës Profesionale të Kontrollorëve të Trafikut Ajror ka njoftuar se ata pritet të dorëzojnë dorëheqjen në mbështetje të aktiviteteve sindikaliste. Gjithashtu, është planifikuar një auditim i plotë nga autoritetet vendore dhe ndërkombëtare për të hetuar funksionimin e mëparshëm të M-NAV. /Telergafi/