Progres i hatashëm në anti-doping, krerët e Agjencisë Botërore të kënaqur me punën në Kosovë

Sot në ambientet e Komitetit Olimpik të Kosovës (KOK) u mbajt një takim mes krerëve të këtij institucioni dhe përfaqësuesve nga Agjencia Botërore e Anti-Dopingut (WADA), nga Agjencia e Anti-Dopingut të Sllovenisë (SloADO) dhe nga Agjencioni i Kosovës për Anti-Doping (KosADA).

Drejtori i WADA-s, Sebastien Gillot së bashku me drejtorin e SloADO-s, Janko Dvorsak mbajtën sot një takim me krerët e KOK-ut, presidentin Ismet Krasniqi dhe sekretarin gjeneral, Besim Aliti dhe me koordinatorin e KosADA-s, Bernard Tahirbegolli, raporton KosovaPress

Për drejtorin e WADA-s për Evropë, Sebastien Gillot kjo është vizita e tij e dytë në Kosovë pas afro tri viteve, dhe që nga ajo kohë ai tha se ka vërejtur një përparim të madh sa i përket Anti-Dopingut në vendin tonë.

Po ashtu, Gillot tha se KosADA e ka mbështetjen e plotë nga Parlamenti i Kosovës dhe Komiteti Olimpik Ndërkombëtar, pasi që është tejet e rëndësishme përkrahja nga autoritetet që të praktikohet sa më pastër sporti, mision ky i WADA-s në të gjithë botën.

Se anti-dopingu ka pasur një progres të madh në Kosovë e thotë edhe koordinatori i KosADA-s, Bernard Tahirbegolli, për të cilën është e rëndësishme që sportistët tanë të garojnë pastër, pa doping dhe të jenë të barabartë me të gjithë sportistët e tjerë në botë.

KosADA, është organizatë e përcaktuar nga vendi si institucioni kryesor në nivel kombëtar për programet anti-doping në nivel vendi. Në mars të vitit të kaluar në vendin tonë, respektivisht në Kuvendin e Kosovës, u miratua ligji Anti-doping, i cili ka për qëllim fuqizimin e integritetit të sistemit sportiv, kujdesin ndaj shëndetit të sportistëve dhe sportisteve dhe sigurimi i drejtësisë dhe mundësive të barabarta në gara sportive.