Profesorët e UKM-së në Shkup paralajmërojnë grevë, kërkojnë paga më të larta

Profesorët universitarë në Universitetin Shën Kirili dhe Metodij në Shkup, përsëri kanë paralajmëruar grevë.

Pakënaqësia e tyre vjen si shkak i pagave të ulëta, që siç thonë ata nuk janë të denja për një akademik.

“Paga e profesorit asistent apo doktor të shkencave në UKM është nën mesataren në nivel shtetëror, sepse merr pagë prej 30.590 denarë”, tha prof. Dr Angel Ristov, kryetar i Sindikatës së UKM-së, në një intervistë për “360 gradë” në Alsat.

Kryetari i Sindikatës tha se asnjëherë në historinë e universitetit gjendja e punonjësve nuk ka qenë më e vështirë dhe më e keqe.

“Nëse deri të premten Qeveria nuk ulet në tavolinë me Sindikatat e Universitetit, sindikata do të iniciojë pajtimin për grevë. Përmenda se paga e një profesori të rregullt, i cili gjithë jetën ia ka kushtuar shkencës, arsimit, të rinjve, brezave të ardhshëm është 650 euro. Në ambient të afërt shembull nëse marrim rajonin, në Kosovë – 1500 euro paga, Serbi – 1800 deri në 2000 euro paga, Kroaci – 2000 euro paga, Slloveni – 2500 euro paga, vetëm ne kemi mbetur shumë prapa të gjitha vendeve të rajonit, por edhe pas vendeve të Evropës dhe botës”, tha profesor Ristov.

Ndryshe, greva nga UKM u paralajmërua disa muaj më herët mirëpo aso kohë nga Universiteti deklaruan se po i japin kohë Qeverisë që të mendoj një zgjidhje të përshtatshme për kërkesat e tyre.