Presidenti Meta, Ramës: Koha e drejtimit të shtetit me Sekretar të Parë ka përfunduar!

Presidenti Ilir Meta deklaron se nuk do të pranojë të sfidohet nga Edi Rama. Duket se pas mosdekretimit të Sandër Lleshit si ministër i Brendshëm, debati mes tyre është ashpërsuar.

Zëdhënësi i Presidentit të Republikës, Tedi Blushi, i pyetur nga mediat, lidhur me takimin e djeshëm “Rama-Meta”, thekson se: “Informacioni i dhënë nga Kryeministria lidhur me takimin ka qenë ezaurues”.

“Presidenti Meta konfirmon përkushtimin e tij maksimal në respekt të Kushtetutës, për të bashkëpunuar me të gjitha institucionet në vend, në interes të stabilitetit, forcimit të institucioneve dhe rritjes të kulturës së bashkëpunimit ndërinstitucional me transparencë dhe konstruktivitet”, tha Blushi.

Presidenti i Republikës, sipas tij, bën të qartë se nuk do të lejojë asnjë përpjekje sfiduese ndaj autoritetit te institucionit që përfaqëson si Kryetar i Shtetit, Komandant i Përgjithshëm i Forcave te Armatosura dhe Kryetar i Këshillit të Sigurisë Kombëtare.

“Presidenti i Republikës ka shprehur gjithmonë gatishmërinë e tij t’i japë shpjegime në mënyrë transparente dhe të përgjegjshme Kuvendit të Republikës së Shqipërisë për të gjitha çështjet që Kuvendi do të shprehë interes. Presidenti Meta ka bindjen e plotë se koha e drejtimit të shtetit shqiptar me Sekretar të Parë ka përfunduar njëherë e përgjithmonë”, thekson deklarata e zëdhënësit të Presidentit Meta, Tedi Blushi. /Telegrafi/