Presidenti i Meksikës me një propozim për pensionistët, diçka që nuk është bërë as nga vendet shumë më të pasura se vendi i tij

Presidenti i Meksikës tha të hënën se do të bëjë një propozim që t’u garantohen njerëzve pensione të barabarta me pagat e tyre të plota në kohën kur dalin në pension.

Dhe ky premtim po vlerësohet si shumë ambiciozë, pasi që, diçka e tillë nuk është bërë nga asnjë vend tjetër, madje as nga ata shumë më të pasur se Meksika, përcjell Telegrafi.

Kjo thuhet të jetë një nga 20 reformat kushtetuese që presidenti Andrés Manuel López Obrador nuk ka pothuajse asnjë shpresë për t’u miratuar në tetë muajt që i kanë mbetur në detyrë, por që mund të jetë pjesë e një përpjekjeje për të tërhequr votuesit në zgjedhjet presidenciale të 2 qershorit.

“Është një vit zgjedhor, kështu që të gjitha këto iniciativa reformash mund të shihen si diçka për t’i bërë njerëzit të votojnë për Morenën”, tha Gabriela Siller, drejtore “Banco Base” me bazë në Nuevo Leon.

Për momentin, López Obrador nuk i ka votat në Kongres për të miratuar reformat, duke qenë se ato kërkojnë dy të tretat e votave për të ndryshuar Kushtetutën dhe partitë opozitare nuk ka gjasa t’i bashkohen atij, pak muaj të mbetura për të në detyrë.

Për shembull, ai dëshiron që Garda Kombëtare – tani agjencia kryesore e zbatimit të ligjit në Meksikë – t’i dorëzohet ushtrisë, një ndryshim që Kongresi tashmë e ka refuzuar. Ai gjithashtu dëshiron të kufizojë shumicën e agjencive rregullatore dhe mbikëqyrëse të qeverisë. /Telegrafi/