Botë Nga Bota

Polonia e konfirmon, Netanyahu nuk do të arrestohet nëse merr pjesë në përvjetorin e Aushvicit

Para 1 muaji

Qeveria polake ka garantuar se kryeministri izraelit Benjamin Netanyahu nuk do të arrestohet nëse merr pjesë në 80-vjetorin e çlirimit të kampit të vdekjes Aushvic-Birkenau, pavarësisht urdhërit të Gjykatës Penale Ndërkombëtare (ICC) kundër tij.

Presidenti i Polonisë Andrzej Duda, nga partia opozitare Ligj dhe Drejtësi (PiS), këtë javë i shkroi qeverisë duke kërkuar që Netanyahu të mos arrestohej nëse vendos të marrë pjesë në përkujtimin e Aushvicit më 27 janar, sipas një ndihmësi presidencial.

Ndërsa zyra e kryeministrit Donald Tusk publikoi të enjten një rezolutë duke thënë se do të siguronte “pjesëmarrjen e sigurt të liderëve të Izraelit në përvjetor”.

“Konfirmoj, pavarësisht nëse është kryeministri, presidenti apo ministri, kushdo që do të vijë nga Izraeli në Oswiecim për festimet në Aushvic do të jetë i sigurt dhe nuk do të ndalohet”, tha Tusk.

Por, Tusk e bëri të qartë se rezoluta ishte “e saktë” dhe zbatohet vetëm për përvjetorin e Aushvicit, shkruan euronews, përcjell Telegrafi.

“Është gjithashtu shumë e rëndësishme për ne që Polonia të mos jetë ndër ato vende që haptazi dhe demonstrativisht duan të shpërfillin vendimet e gjykatave ndërkombëtare”, shtoi ai.

Bëhet e ditur se4 ICC lëshoi urdhërarreste në nëntor për Netanyahun dhe ish-ministrin e tij të mbrojtjes, si dhe një lider të Hamasit, për krime të dyshuara lufte dhe krime kundër njerëzimit gjatë luftës 15-mujore në Gaza.

Vendeve anëtare të ICC-së, si Polonia, u kërkohet të ndalojnë të dyshuarit që përballen me një urdhër nëse shkelin në tokën e tyre.

Gjykata ka më shumë se 120 shtete anëtare, megjithëse disa vende, përfshirë Francën dhe Hungarinë, kanë thënë tashmë se nuk do ta arrestojnë atë.

Kryeministri hungarez Viktor Orban madje tha se do të kundërshtonte urdhrin duke ftuar Netanyahun në Budapest.

Ndryshe, në konferencën për shtyp të së premtes të Komisionit Evropian, zëdhënësi Anouar El Anouni tha se BE është “fort e përkushtuar ndaj drejtësisë penale ndërkombëtare”.

“BE u bën thirrje të gjitha shteteve të sigurojnë bashkëpunim të plotë me ICC, duke përfshirë ekzekutimin e menjëhershëm të urdhërarresteve”, tha ai kur u pyet për këtë çështje.

Është e paqartë nëse Netanyahu planifikon të marrë pjesë në përvjetor më vonë këtë muaj, megjithëse ai ka qenë i pranishëm në ngjarjet e mëparshme në Aushvic.

Ministria e Jashtme e Polonisë, në përgjigje të një pyetjeje me email, tha se “nuk ka marrë asnjë informacion deri më tani që tregon se kryeministri Benjamin Netanyahu do të marrë pjesë në kremtimin e 80-vjetorit të çlirimit të Aushvicit”.

Raportohet se në përvjetor do të marrin pjesë zyrtarë ndërkombëtarë dhe të mbijetuar të moshuar.

Ai do të zhvillohet në Oswiecim, një qytet që ishte nën pushtimin gjerman gjatë Luftës së Dytë Botërore, ku forcat gjermane naziste operuan kampet e tyre më famëkeqe të vdekjes.

Më shumë se 1.1 milion njerëz u vranë në Aushvic.

Historianët thonë se shumica prej tyre, rreth një milion, ishin hebrenj, por viktimat përfshinin edhe polakë, romë, e të tjerë.

Të paktën 3 milionë nga 3.2 milionë hebrenjtë e Polonisë u vranë nga nazistët, që përbën rreth gjysmën e hebrenjve të vrarë në Holokaust. /Telegrafi/