Policia japoneze e pranon se kishte mangësi në siguri në kohën kur u qëllua për vdekje Shinzo Abe

Policia japoneze  e ka pranuar se kishte mangësi në sigurinë për ish-kryeministrin japonez, Shinzo Abe, i cili u qëllua për vdekje në qytetin jugor të Nara-s të premten.

“Është e pamohueshme që ka pasur probleme në siguri”, tha shefi i policisë së Nara-s, Tomoaki Onizuka.

Një person i armatosur hapi zjarr ndaj Abe-s në një ngjarje të fushatës politike – një krim që ka tronditur thellësisht Japoninë.

Lexo po ashtu Pamje të reja të vrasjes së ish-kryeministrit japonez, njëri nga rojet përpiqet të bllokojë plumbat me çantë

Një autokolonë që mban trupin e Abe-s ka mbërritur në shtëpinë e tij në Tokio.

Policia thotë se i dyshuari, i quajtur Tetsuya Yamagami, 41 vjeç, kishte inat ndaj një “organizate specifike”. Ai besonte se Abe ishte pjesë e saj, thanë ata.

Yamagami e ka pranuar se e ka qëlluar atë me një armë të bërë vetë, sipas policisë.

“Çështja urgjente është që ne të kryejmë një hetim të plotë për të sqaruar se çfarë ka ndodhur”, tha shefi i policisë Onizuka, pa specifikuar se ku pa gabime. Ai ishte në prag të lotëve duke iu drejtuar gazetarëve.

Mediat japoneze cituan burime të afërta me hetimin, të cilët thanë se Yamagami besonte se Abe ishte i lidhur me një grup fetar, i cili, sipas Yamagami-t, kishte shkatërruar financiarisht nënën e tij.

Yamagami i tha policisë se kishte shërbyer në marinën japoneze, Forcën Detare të Vetëmbrojtjes, për tre vjet. Kohët e fundit, ai kishte punuar në një fabrikë në Japoninë perëndimore. /Telegrafi/