Pesë përgjigjet që do t’i marrim pas rimeçit ndërmjet Deontay Wilder dhe Tyson Fury

Kur u ndeshën për herë të parë Deontay Wilder dhe Tyson Fury, ishte një triller, ndërsa i dyti mund të jetë akoma më i mirë. Të shtunën mbrëma (mëngjesin e të dielës me kohën tonë) në MGM Grand Garden Arena të Las Vegasit, kampioni i WBC-së do ta mbrojë titullin ndaj kampionit lineal.

Meçi ndërmjet boksierit amerikan (42-0-1) dhe atij britanik (29-0-1), që të dy të pamposhtur, konsiderohet si një prej më të mëdhenjve që nga dueli mes Mike Tyson dhe Evander Holyfield në vitin 1997.

Lexo po ashtu ‘Deontay Wilder vs Tyson Fury 2’: Gjithçka që duhet të dini për meçin e të pamposhturve për titullin WBC

Më 1 dhjetor 2018, Wilder dhe Fury dhuruan një përballje të paharruar. Pamë aftësitë e mrekullueshme në boks të Tysonit dhe fuqinë shkatërruese të Deontay. Ndërsa pas 12 raundesh, asnjëri nuk fitoi, pasi gjyqtarët vendosën për barazim. Dhe tash sërish do ta shohim përballjen që kërkon fituesin.

Revista Forbes ka bërë përmbledhjen e pesë pyetjeve, përgjigjet e të cilave do t’i mësojmë pas rimeçit:

Për çfarë është dueli

Për trashëgimi. Në garë janë titujt WBC dhe lineal në kategorinë e peshave të rënda, mirëpo ajo për të cilën vërtet luftohet është titulli i ‘boksierit më të mirë në planet’ dhe ndoshta ‘boksierit më të mirë të gjeneratës’ për kategorinë e peshave të rënda. Fury u bë kampion i unifikuar kur e mposhti Wladimir Klitschkon në vitin 2015 dhe mori titullin e kampionit lineal dhe përkundër se u tërhoq për dy vjet e gjysmë, ai u kthye dhe ka vazhduar të jetë i pamposhtur. Ndërsa Wilder krahas titullit WBC e dëshiron edhe atë lineal për ta çimentuar trashëgiminë e tij në historinë e boksit.

A mund që Fury ta nokautojë Wilderin

Vështirë se mund të ndodhë. Tyson ka premtuar se do ta nokautojë Deontayn pasi, sipas tij, gjyqtarët ia vodhën fitoren nga meçi i parë. Britaniku ka pohuar se mënyra e vetme për ta rregulluar çështjen e pikëve është që të fitojë me nokaut. Mirëpo, hera e fundit kur Fury ka fituar me nokaut ka qenë para shtatë vitesh, në prill të vitit 2013, kur e nokautoi Steve Cunninghamin.

A mund që Wilder ta nokautojë Furyn

Padyshim se po. Amerikani mund ta nokautojë cilindo kundërshtar. Goditja e tij me të djathtën është e pamëshirshme dhe fatale për cilindo kundërshtar. Ai e rrëzoi dy herë Furyn në duelin e parë, mirëpo goditjen nuk ishin aq të fuqishme për nokaut, prandaj britaniku u çua në të dyja rastet dhe e vazhdoi meçin deri në fund. Pritet të shihet nëse ai do t’u bëjë ballë goditjeve të Deontay në rimeç.

A do t’i thyejë rekordet e shikueshmërisë

Gjasat janë minimale. ESPN dhe FOX Sports janë bashkëprodhues të ‘Wilder-Fury II’ dhe së bashku me Top Rank kanë investuar shumë në promovimin e duelit, madje edhe me dy reklama të shtrenjta në Super Bowl. Mirëpo, është thuajse e pamundur që të thyhet rekordi i platformës paguaj për të shikuar i meçit ndërmjet Manny Pacquiao dhe Floyd Mayweather që në vitin 2015 siguroi 4.6 milionë abonues. Ky duel parashikohet të blihet nga dy milionë shikues.

A do të kemi trilogji

E mundshme. Wilder dhe Fury janë partnerë të mirë biznesi, përkundër asaj që e thonë nëpër intervista apo asaj që ndodh në ring. Nëse ky rimeç fiton simpatinë e tifozëve të boksit, atëherë mund të presim edhe përballjen e tretë mes tyre.

/Telegrafi/