Përurohet Qendra për Trajtimin e Qenve Endacakë në Prishtinë

Gjatë ditës së mërkurë, në Prishtinë është përuruar Qendra për Trajtimin e Qenve Endacakë.

Sipas një njoftimi të bërë nga kryetari i Prishtinës, Përparim Rama, kjo qendër është e furnizuar me pajisje moderne dhe gjithashtu ka veterinar dhe staf mbështetës.

“Sot përuruam Qendrën për Trajtimin e Qenve Endacakë. Kjo Qendër do të ketë një rol të rëndësishëm në sigurinë e qytetarëve tanë duke reduktuar numrin e qenve në rrugë dhe duke u kujdesur për mirëqenien e tyre. Qendra është furnizuar me pajisje moderne dhe ka të punësuar veterinarin, dy teknikë veteriner si dhe stafin tjetër mbështetës”, ka shkruar Rama.

Veç kësaj, Rama ka shkruar se së shpejti do të fillojë bartja e qenve nga rrugtë e Prishtinës për në qendër.

“Shumë shpejt do të fillojë bartja e qenve endacakë nga rrugët e Kryeqytetit në këtë Qendër për trajtim, e më pas në pjesën e poshtme të Qendrës ku po finalizohet pjesa e strehimit për rreth 350 qen. Qentë do të mbahen në pjesën e strehimit deri në adoptimin e tyre. Siç është në dijeni opinioni, qentë të cilët adoptohen do të trajtohen falas në këtë Qendër për tërë jetëgjatësinë e tyre, si dhe pronarët do të marrin nga 50 euro në muaj për secilin qen të adoptuar nga Kryeqyteti”, ka shkruar ai.

Tutje ai i ka bërë thirrje qeverisë që ta bëjë prioritet trajtimin e problemit të qenve endacakë.

“I bëjmë thirrje Qeverisë së Republikës së Kosovës që të bëj prioritet trajtimin e problemit të qenve endacakë në nivel të Kosovës duke mbështetur komunat me resurse financiare dhe të tjera. Pa një angazhim të tillë, problemi nuk mund të zgjidhet në nivel nacional”, ka shkruar ai. /Telegrafi/