Përfundon padia mes BE-AstraZeneca, zbulohen detaje të marrëveshjes

Është arritur një marrëveshje për shpërndarjen e dozave të mbetura të vaksinave të coronavirusit, duke i dhënë fund padisë.

Sipas një marrëveshjeje midis Komisionit Evropian dhe AstraZeneca, kompania farmaceutike është zotuar të dërgojë 60 milionë doza të vaksinës së saj në Bashkimit Evropian deri në fund të tremujorit të tretë të këtij viti, 75 milionë shtesë deri në fund të vitit dhe 65 milion doza deri në fund të tremujorit të parë të 2022.

Kjo përfundoi procesin gjyqësor në vazhdim, pasi Komisioni Evropian filloi procedurat ligjore kundër AstraZeneca në muajin prill të këtij viti për mosrespektim të kontratës për furnizimin e vaksinave, dhe për shkak se AstraZeneca, sipas Komisionit Evropian, nuk kishte një “plan të besueshëm” për të siguruar dërgesat në kohë.

BE -ja mund të përshpejtojë procesin e vaksinimit. Marrëveshja do t’i mundësojë Bashkimit Evropian të përshpejtojë programin e vaksinimit.

KE ka njoftuar se, sipas marrëveshjes së re, vendet anëtare do të marrin dërgesa të rregullta.

“Ka dallime të konsiderueshme në përqindjen e të vaksinuarve midis shteteve tona anëtare dhe disponueshmëria e vaksinave, përfshirë AstraZeneca, është vendimtare”, njoftoi BE-ja. /Telegrafi/