Për nder të 28 Nëntorit, dhurohet gjak në Komunën e Shtimes (Video)

Për nder të 28 Nëntorit, në Shtime u  zhvillua aksion i dhurimit të gjakut. Në këtë aksion kanë marrë pjesë shumë qytetarë. Organizatorët thonë se aksioni do të zhvillohet çdo vit për Festën e Flamurit.

Arben Behrami nga Komuna e Shtimes, për festën e 28 nëntorit vendosi që pasditen e tij ta shfrytëzojë duke dhuruar gjak për njerëzit në nevojë. Ai lut të gjithë qytetarët që t’i bashkohen aksionit humanitar të ndërmarrë në fshatin Pjetërshticë të Shtimes.

“Sot e kemi festë, është ditë pushimi. Kam pasur kohë për të dhuruar gjak. Iniciativë e mirë iu kisha bërë apel të gjithë shqiptarëve të dhurojnë gjak sa më shumë”, deklaroi qytetari Arben Behrami.

Në këtë iniciativë, nuk ishin vetëm qytetarët që dhuruan gjak. Edhe kryetari i Shtimes, Naim Ismajli dhuroi gjak për të dëshmuar edhe rëndësinë e kësaj dite.

“Unë isha këtu bashkë me Kryesuesen e Kuvendit, bashkë me drejtorët dhe këshilltarët komunal, që të solidarizohemi dhe të dhurojmë gjak sepse është kontributi më i mirë që mund t’i bëjmë popullit tonë, duke pasur parasysh se nevojat për gjak janë të vazhdueshme”, deklaroi kryetari i Komunës së Shtimes, Naim Ismajli.

Ndërsa njëri ndër organizatorët, thotë se qëllimi i kësaj iniciative, ka një simbolikë të madhe.

“Qëllimi i këtij aksioni është që ne në këtë kohë lirie, kohë paqe të mund të bëjmë diçka që nuk kemi mundur të bëjmë në kohë lufte, qoftë për arsye tjera qoftë për shkak të moshës. Për kohën moderne, patriotizëm ka qenë ky aksion”, deklaroi organizatori i aksionit Lumni Amrushi.

Doktor,  Fatmir Hajdari, thotë se numri i qytetarëve që kanë dhënë gjak, këtë vit është rritur dukshëm nga viti i kaluar.

“Këtë vit, dukshëm është rritur numri i dhuruesve të gjakut. Kanë ardhur nipat mbesat, hallall iu koftë atyre që po dhurojnë gjak”, deklaroi mjeku Fatmir Hajdari.

Sipas organizatorëve kjo iniciativë do të vazhdojë edhe në vitin e ardhshëm. /Telegrafi