Gjykata Themelore e Prishtinës e ka shpallur të pafajshëm në të tri akuzat ish-imamin e Xhamisë së Madhe, Shefqet Krasniqin.
Ish-imami akuzohej “për shtytje për terrorizëm, nxitje të urrejtjes dhe shmangie nga tatimi”.
Ndërkohë, përveç mediave vendore, përcjell Telegrafi, një lajm i tillë ka zënë vend edhe në media prestigjioze, si “The Washington Post”.
Në artikullin e vet, ky medium shkruan se një gjykatë e Kosovës ka liruar një imam mysliman të akuzave për terrori dhe gjuhë urrejtjeje.
Po sipas mediumit, gjyqtarët kishin gjetur "prova jo të mjaftueshme" për të provuar se Shefqet Krasniqi ishte i përfshirë në terror ose kishte përdorur gjuhën e urrejtjes.
“Ata gjithashtu e shfajësuan atë për evazion fiskal”, shkruan mediumi në fjalë.
Ndërkohë, WP shton se Krasniqi u akuzua për interpretimin e Kur'anit tek besimtarët e tij në vitet 2013-2014, duke përdorur rrjete sociale dhe burime të tjera informacioni dhe duke u bërë thirrje atyre të bashkohen me grupet ekstremiste në Siri dhe Irak.
The Washington post thekson se Kosova, “me 1.8 milion popullsinë e saj kryesisht myslimane, ka qenë një burim i madh i luftëtarëve të huaj, me 350 grupe të grupeve ekstremiste në Siri dhe Irak. Autoritetet kanë thënë se rreth 180 prej qytetarëve të vendit janë akoma aktiv atje”.
Ndërkohë, pas lirimit nga akuzat, Krasniqi ka thënë se “drejta doli në pah”.
“Kam qenë i bindur, si ju dhe ata që kanë urdhëruar të më arrestojnë, se nëse në vendin tonë ka vetëm një shkëndijë drejtësie puna ime është shumë e qartë dhe pa asnjë shibël do të del në pah, dhe fal Zotit kjo u vërtetua. Faleminderit për të gjithë ju që më keni përkrahë, pavarësisht të gjitha lakimeve që kanë qenë herë-herë”, ka thënë Krasniqi. /Telegrafi/
