PDK kundër planit të Kalabrisë: 15 hektarë të pronës komunale u tjetërsuan për ndërtim

Nënkryetarja e PDK-së, Besianë Musmurati dhe shefi i grupit të asambleistëve të PDK-së në Prishtinë, Leutrim Retkoceri  në një konferencë për media treguan për planin e Kalabrisë që u votua të hënën në Prishtinë.

Sipas tyre në këtë plan, 15 hektarë të pronës publike perreth Stacionit të Autobusëve u dhanë për ndërtim të lartë. Planin që e propozoi Përparim Rama, e votoi edhe Lëvizja Vetëvendosje në Prishtinë.

PDK në Prishtinë ishte kundër këtij plani, dhe bëri të ditur që historia e shpronësimit të Badocit po përsëritet edhe në Kalabri.

“Në Badoc, Përparim Rama u mundua që ta tjetërsojë pronën publike për të akomodu kërkesat e disa kompanive të ndërtimit të afërta me të. Në planin për lagjen Kalabria, prapë mbi 15 hektarë të pronës publike u vënë në shërbim të kompanive të ndërtimit” tha Retkoceri.

Ndërsa nënkryetarja Musmurati theksoi që është edhe më shqetësues është fakti që ne nuk mendojmë që Përparim Rama do të ndalet me planin e Kalabrisë. “Ai do të sjellë për votim plane të tjera që prap mund të tjetërsojnë pronën publike” tha Musmurati. /Telegrafi/