Një fluturim i Wizz Air nga Alicante drejt Romës është shndërruar në një përvojë traumatike për pasagjerët, pasi aeroplani u godit nga turbulenca të forta mbi Italinë.
Pasagjerët janë parë të tmerruar dhe u dëgjuan lutje të dëshpëruara në kabinë ndërsa piloti tentoi disa herë të ulej në aeroportin Fiumicino.
Për shkak të motit ekstrem dhe stuhive të fuqishme, aeroplani Airbus A321 u detyrua të devijonte fluturimin drejt aeroportit të Bolonjës.
Fluturimi, i cili ishte nisur me mbi një orë vonesë, përfundoi me ulje emergjente në 03:57 të mëngjesit.
Dhe pamjet e publikuara në rrjete sociale tregojnë pasagjerët të tmerruar, që ulërinin në errësirën e kabinës.
Wizz Air deklaroi se siguria e pasagjerëve është prioritet dhe se “anulimi” i uljes është procedurë standarde në kushte të tilla.
Kompania konfirmoi se pasagjerëve iu sigurua transporti tokësor nga Bolonja për në Romë.
Ngjarja ndodhi vetëm pak javë pasi një fluturim i Ryanair u trondit nga turbulenca ku disa pasagjerë mbetën të lënduar. /Telegrafi/
