Shkolla fillore “Faik Konica” në Prishtinë të hënën, më 29 janar do të fillojë procesin mësimor, pasi gjatë këtyre tri ditëve nuk është mbajtur mësimi i rregullt për shkak të lyerjes së klasave.
Të mërkurën dhe të enjten, pas përfundimit të pushimit dimëror cikli i lartë (nga klasa e gjashtë deri të nëntën) kanë mbajtur mësim me orar të shkurtuar, ndërkaq cikli i ultë nuk kanë mbajtur fare mësim.
Se të hënën do të nis procesi mësimor e konfirmoi për Telegrafin, drejtoresha e kësaj shkolle, Jehona Oruçi.
“Po, të hënën, më 29 janar 2024 rifillon procesi mësimor i rregullt. Orët e humbura do të zëvendësohen në javët në vazhdim, sipas planifikimit të shkollës”, tha Oruçi.
Mësimi i rregullt në shkollë nuk është mbajtur për të mundësuar ajrosjen më të mirë të klasave pas lyerjes dhe për t’i ikur çfarëdo mundësie që era e ngjyrës të ndikojë te fëmijët. /Telegrafi/
