Lajme Kosovë Politikë

Partitë parlamentare kundër kompromiseve në marrëveshjen me Serbinë

Para 4 vitesh

Mospranimi i asnjë kompromisi të ri me Serbinë i ka bashkuar partitë politike parlamentare.

Pozitë dhe opozitë shprehën njëzëri se Kosova në kuadër të dialogut me Serbinë nuk duhet të bëjë asnjë marrëveshje që është në dëm të vendit, pasi sipas tyre, Kosova ka bërë mjaftueshëm kompromise me pranimin e Pakos së Ahtisaarit.

Deputeti i Lëvizjes Vetëvendosje, Artan Abrashi thotë për KosovaPress se Qeveria Kurti në kuadër të dialogut me Serbinë nuk do të pranojë asgjë që i sjell dëme vendit.

“Na është thënë vazhdimisht neve që kompromisi i fundit dhe më i dhimbshëm është pako e Ahtisaarit. Por për fat të keq, edhe pse ka ekzistuar një opinion i GJND-së, që i dha të drejtë pavarësisë së Kosovës, klasa e papërgjegjshme politike iu nënshtrua një lloj procesi të ri, i cili stagnoi çdo gjë në Kosovë.

Çdo gjë tash është peng i vullnetit, apo miratimit të Serbisë, sa i përket Kosovës. Kemi ngecje të njohjeve që ishin duke shkuar shumë mirë. Prandaj ne nuk mund të pranojmë që të vazhdojmë me të njëjtën frymë që i solli pasoja Kosovës.

Është një urgjencë dhe domosdoshmëri që të rishikohen konditat e këtij dialogu dhe të fillojmë ndryshe. Neve na obligon një rezolutë e Kuvendit të Kosovës, e cila është miratuar më 15 mars të vitit 2020, në të cilat janë përcaktuar vijat e kuqe, kornizat që Qeveria e Kosovës duhet t’i përmbahet rreptësishtë.

Karakterit unitar të shtetit, funksionimit të brendshëm institucional, integriteti institucional, territori dhe rendi kushtetues. Asnjë qeveri nuk e ka legjitimitetin t’i vë në pikëpyetje këto”, thotë ai.

Vëmendje të madhe në këtë çështje kërkon edhe ish-anëtari i Kryesisë së PDK-së, Betim Gjoshi, i cili tregon tri parimet që Kosova nuk duhet t’i negocojë në kuadër të dialogut.

“Kosova duhet ta ruaj sovranitetin e vet, funksionimin e brendshëm dhe çdo marrëveshje të jetë në përputhje me Kushtetutën e Kosovës dhe marrëveshja të ketë pjesë të saj njohjen reciproke. Pra Kosova ta fitojë ulësen në OKB dhe njohjen nga Serbia. Çdo temë tjetër që diskutohet sot nuk është në interes të qytetarëve të Kosovës”, thotë ai.

Ndërsa, anëtarja e Kryesisë së LDK-së, Teuta Sahatqija thotë për KosovaPress se çfarëdo kompromisi që do të bëhej do të ishte i dëmshëm për Kosovën.

“Në dialogjet e shumta me ndërkombëtarët është thënë që dokumenti i Ahtisarit është maksimumi i kompromiseve që Kosova po i jep dhe pas këtij dokumenti do të njihet prej të gjitha shteteve të Evropës dhe do të jetë pjesë e kombeve të bashkuara e të tjera.

Prandaj mendoj që Kosova deri më tash ka bërë kompromise maksimale dhe çfarëdo kompromisi që kërkohet prej Kosovës do të kishte qenë i dëmshëm prej mbarëvajtjen dhe funksionalitetin e Kosovës”, thotë ajo.

Në linjë të njëjtë është edhe deputeti i AAK-së, Pal Lekaj.

“Kompromis i dhimbshëm është edhe pako e Ahtisaarit dhe ne nuk guxojmë të shkojmë përtej kësaj dhe të kërkojmë kompromis prapë nga pala kosovare. Nuk di se çka mendojnë por Kosova ka bërë mjaft kompromise dhe ne duhet të mendojmë për vetën tonë duke konsultuar edhe me miqtë tanë ndërkombëtar”, deklaron ai.