Shërbimi Meteorologjik Ushtarak në Shqipëri bën të ditur se në fundjavë vendi do të vijojë të ndikohet nga kushte të qëndrueshme atmosferike si pasojë e masave ajrore të thata me origjinë jugore.
SHMU njofton se moti parashikohet i kthjellët në të gjithë territorin përjashtuar vranësirat e pakta kalimtare kryesisht në mesditë dhe pasdite.
Temperaturat e ajrit do të mbeten konstante në orët e mëngjesit, por rriten lehtë në mesditë duke luhatur vlerat ditore nga 7 gradë Celsius temperatura më e ulët e shënuar në qytetin e Peshkopisë deri në 27 gradë Celsius vlera më e lartë e cila do të shënohet përgjatë Ultësirës Perëndimore.
Era do të fryjë e lehtë me drejtim kryesor juglindje – veriperëndim dhe shpejtësi mesatare 1-5 m/s shoqëruar me dallgëzim në dete të forcës 0-1 ballë. /Telegrafi/
