Panucci flet para ndeshjes me Izraelin: Skuadra është në gjendje të mirë, uroj të rikthehemi tek rezultatet e duhura

Kombëtarja e Shqipërisë do të startojë në Ligën e Kombeve në ndeshjen ndaj Izraelit.

Kuqezinjtë në këtë takim vijnë pas disa rezultateve jo të mira në ndeshjet miqësore.

E trajneri i Shqipërisë, Christian Panucci ka folur në konferencë për shtyp para takimit me Izraelit.

“Skuadra është në gjendje të mirë, kemi punuar mirë këto ditë dhe jemi të gatshëm për të përballuar ndeshjen e nesërme me Izraelin. Për shkak të emergjencës kam grumbulluar edhe lojtarë që nuk kanë luajtur shumë”.

“Di të them se kam zgjedhur eksperiencën në këtë rast, duke marrë lojtarë si Basha, Lilaj, Memushaj”, tha trajneri italian,

Italiani ka folur edhe për të ardhmen e tij në krye të Kombëtares shqiptare.

“A janë vendimtare ndeshjet kundër Izraelit dhe Skocisë? Nuk është një pyetje për mua, pyesni presidentin e Federatës për këtë gjë. Unë përgjigjem vetëm për ndeshjet që do të luajmë dhe jo për stolin tim. Uroj që nesër të kthehemi të fitojmë. Jemi përgatitur dhe shpresoj shumë që nesër të rikthehemi në paraqitjet pozitive dhe të marrim rezultatet e duhura”, deklaroi Panucci.

Ish-futbollisti i skuadrave të mëdha evropiane si Roma, Milan, Real Madrid e Chelsea ka folur edhe për formacionin e mundshëm.

“Për formacionin do të vendos nesër se kush do të zbresë në fushë. Në një ndeshje të tillë kemi punuar me eksperiencën e skuadrës dhe vetëm nesër do ta zbulojmë se çfarë ka ndryshuar dhe çfarë do të ndryshojë në skuadrën e Shqipërisë. Të shohim”, tha ndër tjera Panucci.

Shqipëria dhe Izraeli do të përballen me njëra tjetrën me fillim nga ora 20:45 në Elbasan Arena. /Telegrafi/