Pamjet e reja të kamerave të policisë, tregojnë se si George Floyd në momentet e fundit u kishte thënë se nuk po mund të merr frymë

Në videot e reja, që i kanë filmuar kamerat që ishin të vendosura në uniformat e dy policëve nga Mineapolisi gjatë arrestimit të afro-amerikanit George Floyd gjatë 25 majit, shihet se si Floyd i kapluar nga paniku dhe tejet i frikësuar u flet policëve, disa minuta para vdekjes – duke u thënë se nuk është njeri i keq derisa ata po tentonin ta fusnin në veturën e policisë, raporton CNN.

“Nuk jam ai lloj i njeriut. Kam pasur COVID-19, nuk dua sërish të kalojë përmes asaj faze”, u ka thënë Floyd policëve derisa ata po e prangosnin, transmeton Telegrafi.

Një dëshmitar i rastit e kishte lutur Floydin që të mos u rezistojë, duke e porositur se nuk mund të fitojë. “Nuk dua të fitojë”, ishte përgjigjur Floyd.

Disa minuta më vonë, Floyd ka qëndruar i shtrirë me fytyrë në asfalt, kurse kamerat e kanë filmuar se si me zë të ulët thotë: “Nuk po mund të marrë frymë”, derisa trupi i tij nuk lëvizi më.

Edhe pse transkriptet e videove janë publikuar më herët, vetë videoja paraqet një pasqyrë të qartë të opinionit lidhur me bisedën që Floyd e kishte zhvilluar me policët, që më vonë u akuzuan për vrasjen e tij.

Gazetarët dhe shoqëria civile janë lejuar gjatë të premtes të shohin pamjet në një termin që ishte caktuar më herët. Gjykatësi Peter Kayhill, pa ndonjë shpjegim ka refuzuar që të publikohet videoja.

Pamjet e policëve Thomas Layne dhe Jay Kuenga janë pjesë e akuzës, dhe dy policët tjerë për shkak të vdekjes së Floyd më 25 maj. Polici Derek Chauvin, i cili ia mbajti gjurin në qafë Floydit për afro 8 minuta, akuzohet për vrasje të shkallës së parë.

Lany dhe Kueng si dhe polici i tretë Tou Tao akuzohen për ndihmë dhe bashkëpjesëmarrje. Që të katër policët janë shkarkuar në ditën kur është konfirmuar vdekja e Floyd.

Videoja e policit tregon vdekjen e Floyd, të cilin opinioni publik arriti ta sheh falë një videoje amatore të regjistruar me telefon të mençur nga një kalimtar rasti, gjë që ka nxitur protesta në Minneapolis.

Floyd dyshohet se kishte përdorur 20 dollarë të falsifikuara dhe pasi që menjëherë nuk i kishte ngritur duart në ajër, Lane ia kishte drejtuar revolen.

Ata e kishin prangosur, e asi për asnjë moment nuk u rezistoi duke ua bërë me dije se vuan nga klaustrofobia, duke i lutur që të mos e fusin në veturën e policisë.

Gjatë orvatjes me policinë, Floyd kishte humbur këpucën. Ajo çfarë duket të jetë kamera e Chauvin, shihet duke rënë para veturës, kurse Floyd në fund ka përfunduar në trotuar derisa policët e mbanin.

Policët nuk dukeshin shumë të brengosur derisa ai qëndronte me fytyrë në asfalt. “Mendoj se ka humbur vetëdijien”, dëgjohet duke thënë njëri prej tyre.

Gjithashtu dëgjohet dikush duke pyetur “Jeni mirë djem?”, e dikush përgjigjet “deri më tani, po”. E polici tjetër që duket të jetë Lane, thotë se i është gërvishtur paksa gjuri, por do të mbijetojë.

Lane nuk dukej i brengosur kur për herë të parë e pyeti Chauvin, nëse do të duhej ta kthenin në anën tjetër Floydin. Mund të dëgjohen se si personat që ishin mbledhur përreth tij, kërkojnë nga policët të verifikojnë nëse ende ka puls apo është duke marrë frymë.

Disa minuta më vonë, Lane duket paksa i brengosur kur sërish pyet nëse Floydin e ka kthyer në anën tjetër. Por, policët heshtën, derisa Keng ia kontrollin pulsin Floydit dhe thotë se nuk po mund t’ia ndjejë.

Në kamerën e Lane shihet se si e bartë me barelë Floydin, deri te vetura e ndihmës së shpejtë dhe vazhdimisht merr instruksion për reanimacion.

Gjithashtu shihet se si Lane me duart i bën masazh në gjoks Flyodit, por pa ndonjë rezultat, shkruan Zëri i Amerikës.

Vetura e ndihmës së shpejtë për disa minuta ka qenë e përkuar afër marketit derisa Lane dhe pjesëtarët e shërbimit të ndihmës së shpejtë janë munduar ta rikthejnë në jetë Floydin, në vend se ta dërgojnë me urgjencë në spital.

Përfaqësuesi i familjes së Floyd ka paditur qytetin e Mineapolisit dhe katër policët, duke kërkuar një shumë të caktuar si dëmshpërblim. /Telegrafi/