Pacolli pritet nga presidentja e Maltës, Coleiro Preca

Zëvendëskryeministri i parë dhe ministri i Punëve të Jashtme i Kosovës, Behgjet Pacolli, gjatë vizitës së tij zyrtare në Maltë, u prit në një takim të veçantë nga presidentja e këtij shteti Marie-Louise Coleiro Preca, me të cilën ka biseduar për nënshkrimin e një memorandumi bashkëpunimi në mes dy vendeve në fushat me interes.

Në kuadër të këtij takimi, Pacolli fillimisht i ka përcjellë përshëndetjet presidentes së këtij shteti në emër të presidentit të Kosovës, Hashim Thaçi, ndërkohë që e ka falënderuar për mbështetjen konsistente të Maltës që i ka dhënë Kosovës dhe nëpër të gjitha proceset e rëndësishme që ka kaluar vendi ynë.

Zëvendëskryeministri Pacolli kërkoi që mbështetja e tillë të vazhdojë të ekzistojë edhe më tutje, në veçanti sa i përket anëtarësimit të vendit tonë në Këshillin e Evropës, Interpol, UNESCO dhe organizata të tjera dhe mbështetjen për forcimin e legjitimitetit ndërkombëtarë të Kosovës nëpërmjet zgjerimit të njohjeve të reja.

Duke folur për anëtarësimin e Kosovës në organizata ndërkombëtare, presidentja e Maltës, Marie-Louise Coleiro Preca tha se vendi i saj në vazhdimësi e ka mbështetur Kosovës dhe do të vazhdojë që ta mbështesë edhe më tutje.